Gogoi-a'n central force dah zel turin a ngen

Assam Chief Minister Tarun Gogoi chuan Nilaini khan New Delhi-ah Union Home Minister Rajnath Singh a hmu a, Assam-a venhimna pe tura central force dahte chu tharum thawhna thleng thut thei a nih vangin dah chhunzawm zel turin a ngen.

Gogoi chuan Ministry of Home Affairs-in remna zawnga hmarchhak helte inbiakna a neihpui mek chu a rang lama kalpui turin Union Home Minister Singh a ngen bawk.

Assam sorkar chuan sorkar laipui nena ṭangruala United Liberation Front of Assam (ULFA) helte inbiakna an neihpui mek chu a rang lama chinfel a duh a, nakkuma state assembly inthlan nei tur an nih avangin ULFA nena remna tluantling an siam thei anih chuan Assam-a Congress sorkar chuan nakkum inthlanah a ṭhatpui a beisei.

Chief Minister Gogoi chuan Union Minister Singh a hmuh hnu hian chanchin thar thehdarhtute a kawm nghal a, tun dinhmunah Assam boruak a ralmuan thu a sawi.

"Sorkar laipui chuan Assam-a central force a dahte chu a lachhuak dawn niin kan hria a, hei vang hian central force te chu dah rih tura kan ngen bakah lakchhuah an nih chuan tharum thawhna a chhuah a hlauhthawnawm a ni," a ti.

Assam-a venhimna pe tura central force dahte hi buaina chhuah duhna, Bodoland Territorial Area District (BTAD) huam chhung leh ramri chhehvelah dah an ni.

Gogoi chuan Indian Army te'n Myanmar rama hmarchhak hel awmte laka beihpui an thlak chu lawmawm a tih thu sawiin, hetianga hmarchhak hel, Myanmar rama awmte laka beihpui thlak hi hun rei tak kalta aṭanga an lo beisei tawh a ni, a ti.

Remna zawnga inbiak duh lo, Paresh Baruah-a kaihhruai ULFA (I) hel leh Songbijit-a kaihhruai NDFB (S) helte hi Myanmar rama inkulh zingah an tel a, Assam-a buaina liantham thlen ṭhinte an ni.

Hetihlai hian Assam Chief Minister Gogoi chuan sorkar laipuiin funding pattern a tihdanglam chuan schemes kalpui mekte a tibuai dawn a ni, a ti.

"Sorkar laipui chuan state sorkar te hnena a lo tiam tawh, central fund te chu a la pekchhuah loh avangin Assam sorkarin sum leh paiah harsatna a tawk mek a ni," a ti.

NDA sorkar financial policy thar chu sawiselin Gogoi chuan funding pattern tihdanglam leh sorkar assistance ṭhenkhat tihtawp chuan central schemes kalpui mek te chu tibuai vek dawn a ni, tiin a sawi bawk.

14th Finance Commission (FFC) hnuaiah BJP sorkarin state tinte hnenah fund tam zawk pek a tum thu a tarlan chu Gogoi chuan chhangletin, lehlamah fund an pek tipung mah se, leh lamah chuan fund pekna tur an tibo thung a ni, a ti.

Assam Chief Minister Gogoi chuan Prime Minister Narendra Modi chu hmarchhak bial mipuite harsatna ngaihthahah puhin, hmarchhak bial chungchang chu ṭhenawm rama a zin pawhin a bawhzui duh lo a, kan thil ngaihpawimawh hi a hre duh lo a ni, a ti.

Hmarchhak state te special category status tihtawp a nih chungchangah Gogoi hian hmarchhak state Chief Minister te aiawhin Prime Minister Modi hmuh a tum a, mahse a appointment hi ni 45 chhung chinfel lohin a la awm.

"Modi-a'n Team India tiin a sawi ṭhin a, mahse Bangladesh a tlawh ṭumin eng vangin nge hmarchhak state Chief Minister te min telh ve loh?" tiin Gogoi chuan a sawi bawk.