Assam : Assam Governor in CM lehkhabu ziah tlangzarh

Assam governor Laxman Prasad Acharya chuan December 19, 2024 khan chief minister Himanta Biswa Sarma lehkhabu ziah pahnih, Diary (Part3) leh Collection of Speeches (Part3) chu Guwahati-ah a tlangzarh.

Lehkhabu tlangzarh inkhawmah hian CM Himanta chuan a lehkhabu ziah pahnihte chu society chawk phur thei tura a ziah a nih thu sawi. Lehkhabu pahnihte chu Viksit Assam din tura Chief Minister ni laiin hma a lak dan leh hnathawh dante tarlanna niin, nakin hnu zelah pawh document pawimawhah a la hman theih tur thu a sawi bawk.

Governor Acharya chuan mipui nawlpuiin politician te chu an buai vangin lehkhabu ziahnan hun an nei lo tia ngaihdan an neih ṭhin thu a sawi. Chief Minister lehkhabu ziah chuan mi zawng zawng tana chhiar a manhla tur, a bik takin ṭhalaite phurna petu a nih ngei a rin thu a sawi. Prime minister Narendra Modi hmathlir, vikas (development) leh virasat (heritage) chu Sarma chuan Assam-ah a takin a kalpui a ni, a ti. Assam chuan Chief Minister kaihhruainain kum thum liam ta aṭang khan kawng tinrengah hma an sawn thu a sawi.

Sarma chuan a lehkhabu ziahah hian ama mimal thil lam ringawt thlurbing loin rorellai sorkarin hmasawnna rahbi thar a kai te nen a pholan thu a sawi a, state chhung leh pawn lamah politics thila a buai chung chung pawhin diary ziah kawngah buaina a tawh phah loh thu a sawi.

Kum 2021-a Assam Chief Minister a nih aṭanga a thusawi hrang hrang dahkhawmna, Collection of Speech hi tih chhuah a nih ziah thu sawiin, a bu thumnaah hian a thusawi 70 dah a ni tih a sawi bawk.