Meghalaya : Congress-in candidate tur puang

Meghalaya Pradesh Congress Committee (MPCC) chuan February 2025-a Autonomous District Councils (ADC) inthlan lo awm tur atana an candidate tur an puang ve ta.

Block Congress Committee (BCC), District Congress Committee (DCC) leh Pradesh Election Committee (PEC) ten uluk takin candidate tur thlanna hi an nei a ni. Congress Party hian Khasi Hills atan candidate 15 leh Jaintia Hills atan candidate 11 a ti chiang ta a ni.

Candidate tura an thlan zingah hian mi thar pawh an awm a, mi thiam tak tak leh hruaitu tawnhriat nei ṭha tak takte an tel. Candidate an thlan aṭang hian Meghalaya mipuite ṭhatna tura Congresss inpekna a ti lang tih an sawi.

MPCC chuan Khasi Hills leh Jaintia Hills-a vote thlak tur te hnenah Sixth Schedule hnuaia tribal-te dikna humhalh tumpui, Congress party thblawp turin an sawm. An party chuan hmasawnna kawng hrang hrang leh rorelna dik a awm theih nan Meghalaya mipuite tan nasa taka hma an lak tur thu an sawi bawk.