Modi-a'n Manipur leh N'land-ah high level team a tir

13th June, 2015

Prime Minister Narendra Modi chuan hmarchhak biala Indian Army te'n helte chunga beihpui an thlak dan a hmuna enfiah tur leh helpawlte chungchanga thu dik tawk lo darh nasa lutukte zirchiang turin Manipur leh Nagaland-ah high level team a tir.

Ministry of Home Affairs (MHA) official chuan hmarchhak biala venhimna kalpui dan chungchangah Prime Minister Modi chuan Nilaini khan meeting a koh thu a sawi a, Development of North East Region (DoNER) Minister Jitendra Singh leh Joint Intelligence Committee Chairman RN Ravi te chu Manipur leh Nagaland tlawh tura a hriattir thu a sawi. Naga peace talk neih mekah Ravi hi sorkar laipui aiawhtu, interlocutor a ni.

DoNER Minister Singh leh Ravi hian Manipur leh Nagaland-a khawtlang leh tlawmngai pawl hruaitute an kawm ang a, Indian Army te'n helte laka Myanmar-a beihpui an thlak chungchanga thuthang dik lo darh nasa lutuk chungchangah mipuite chu sorkar thuchhuak hriattir an tum dawn a ni.

June 9-a Indian Army te'n hmarchhak helte laka beihpui an thlak thu leh hel 15 chuang an kahhlum thu media hrang hranga an tarlan chu NSCN (K) hel leh United Liberation Front of Asom (Independent) helte chuan chhangletin, thu dik lo a ni, an ti a, Indian Army te chuan helte camp an beih chu Manipur ram chhunga mi a nih thu leh mitthi an awm loh thu an tarlang.

Sorkar laipui chuan hmarchhak hel, Myanmar rama inkulhte lakah Indian Army te hian beihpui an thlak thu a tarlang a, beihpui thlakna chu India-in firfiaka chetna pawmzam a tum lo tih hmarchhak hel thawhpui ṭhin, ṭhenawm ramte a hriattirna a ni, a ti.

Hetihlai hian NSCN (IM) helte'n sipaite lambuntu, helte beihletnaa security force te thawhpui a huam thu a sawi chu sorkar laipui chuan a pawm lo. NSCN (IM) helte leh sorkar laipui chuan inkahhai thuthlung an nei mek a, remna zawnga inbiakna kalpui mek a ni bawk.

NSCM (IM) thuchhuak chuan NSCN (K) helte beihletnaah security force te chu thawhpui a huam thu a tarlang a, mahse hei hi sorkar laipui chuan hnawlin, helte chu amahin a beihlet theih thu a tarlang.