NSCN(K) hotu Khaplang-a Damdawi-inah a awm

June 4-a Manipur, Chandel district-a 6th Dogra Regiment te lam­bun a, sipai 18 thihna thlen­tu, Nationalist Socia­list Council of Nagaland (NSCN-K) hel pawl hotu, SS Khaplang chu a damloh avangin Myanmar-a Yangon damdawi-inah dahluh a ni, tiin Press Trust of India (PTI) chuan a tarlang.

PTI report chuan kum 75 mi Khaplang-a hi tar chak lo lam a nih avangin India-Myanmar ramri dep, Tago hmuna a awmna aṭangin Yan­gon-a lakphei a ni, a ti a, hemi chungchang hi Myanmar chuan India a hriattir hnuah, India chuan Yangon-a lakphei hi a lo remti a ni, a ti. Hetih hun lai hian NSCN (K) leh India sorkar inkahhai thuthlung a la tawp lo a, mahse hemi hnu thla khat vel, March 27 khan NSCN (K) leh sorkar laipui thuthlung hi a tawp a ni.

Khaplang-a hi Naga hnam a ni a, kum 1940, April thla khan Waktham khua, Myanmar-ah a piang a, kum 1975, November thla khan Naga National Council hotu, Angami Zapu Phizo-a'n Shillong Accord a ziah chu NSCN-IM hotu pahnih- Isak Chishi Swu leh Thuingaleng Muivah nen dodalin, Nationalist Socialist Council of Nagaland (NSCN) an din a, an inkara inhriatthiam lohna a thlen hnuah Khaplang chuan kum 1988, April khan NSCN (K) a din a ni.

Khaplang-a kaih­hruaina hnuaiah tun hnai khan hmarchhak biala hel ṭangrual pawl, United National Liberation Front of Western South-East Asia (UNLFWSEA) din a ni a, Assam-a helpawl pahnih - ULFA (I), NDFB (S) leh PLA te an tel a, Manipur-a helpawl ṭang­rual Coordination Com­mittee (CorCom) pawhin an thlawp thu an tarlang.