B'desh-in NE hel laka action lak a tiam

Bangladesh ramri venghimtu, Bangladesh Border Guards (BGB) chuan hmarchhak hel­pawl, a ram chhunga inkulh­te lakah action lak a tiam.

Border Security Force (BSF) thupuangtu Sushil Kumar Singh chuan he thu hi sawiin, Bangladesh-a hmarchhak helte camp 39 awmna chu BGB te an hriattir thu leh BGB te chuan an thudawn chu an lo bawhzui tur thu an tiam tih a sawi.

BSF leh BGB te chuan Ningani zan khan IGP level-ah Border Coordination Conference an nei a, BSF IG Sudesh Kumar chuan BSF te hoin, hmarchhak hel Bangladesh-a inkhuarte chungchang hi BGB hotute an hriattir nghal.

Bangladesh-a camp nei, hmarchhak helte hi- ULFA, NSCN (K), NDFB (S), PLA, HNLC, GNLA leh pawl dangte an ni tiin BSF thuchhuak chuan a tarlang a, pawl ṭhenkhat chuan state hran siam an phut bakah India ram aṭanga zalenna an phut a ni.

BSF chuan helte chet­lakna bakah hian Bang­ladesh mi India rama lutru ṭhinte chu an buaipui thu an tarlang a, ramri kân ṭhinte avanga sorkar phal loh bungraw tawlhruk hluar lutuk chu an ngaihmawh thu an tarlang bawk.