Sorkar laipuiin hmarchhak bial a tiralti

Sorkar laipuiin June 4-a 6th Dogra Regiment te lambuntu, hmarchhak helte laka Myanmar-a beihpui a thlak chuan hmarchhak bial a tiralṭi hle.

Helte hian phuba lak tumin hmarchhak bialah chetlak an tum tiin sorkar laipui thuchhuak chuan a tarlang a, hei vang hian state sorkar te chu fimkhur tur leh inraling renga awm turin a hriattir bawk.

Assam Chief Minister Tarun Gogoi chuan Ningani khan Assam Police official te leh security force official nen high level meeting an nei a, Indian Army te beihpui thlak dan an ennawn bakah Assam-a venhimna kalpui zel dan tur an sawiho. Meeting chuan Assam Police te chu inralring renga awm turin a hriattir nghal.

Hmarchhak biala venhimna kalpui dan turah Union Home Minister Rajnath Singh pawhin Ningani vek khan high level meeting a ko leh a, Defence Minister Manohar Parrikar, Home Secretary LC Goyal, Indian Army Chief Dalbir Singh, Intelligence Bureau official leh Research & Analysis Wing (RAW)official te pawh an tel. Meeting chuan hmarchhak biala venhimna petu, security forces te chu hmarchhak helte lakah inralring reng turin a hriattir bawk.

Assam Chief Minister Gogoi chuan helte'n Assam an luhruk thu an dawng tih a sawi a, thil awm dan an ngaihven reng thu a sawi. Gogoi hian Nilaini khan Union Home Minister Singh chu Delhi-ah a hmu a, Assam-a venhimna petu, central force te chu lachhuak rih lo turin a ngen.

Union Home Minister Singh chuan Assam-a central force te chu lakchhuah an nih chuan tharum thawhna lian tham zawk a thlen a hlauhthawn thu sawiin, central force te chu lakchhuah an nih loh tur thu a lo hrilh.

2015-ah security force te tan NE hlauhawm ber:

Indo-Asian News Service (IANS) chuan hmarchhak bial chu kum 2015 chhunga security force te tana him lo ber tiin a tarlang.

IANS report chuan South Asia Terrorism Portal report siam tarlangin, hmarchhak bialah kumin hian security force 41 an thih tawh thu a tarlang a, kum 2014 khan security force 23 an thih tawh bawk.

IANS chuan June 4-a Manipur, Chandel district-a sipai 18 thihna chu kum 30 kalta chhunga India rama a ruala security force te thih tamna ber a ni, a ti.

State danga Maoist helte beihna kawngah kumin hian security force 34 an thi tawh thu report chuan a tarlang bawk. Jammu and Kashmir-a firfiak pawlte beihletna kawngah kumin hian security force 18 an thi tawh bawk.

State mala security force thihna thleng tam lamah Chattisgarh-ah 28 thiin, India ramah a tam ber a, Manipur 20 leh Jammu & Kashmir 18 te'n an dawt.