Meghalaya minister-in Covid-19 a kai Minister pilot car chesualah police pali an hliam

Meghalaya power minister James Sangma chu Inrinni khan Manipur-ah Covid-19 a kai tih hmuh chhuah a ni. 

James Sangma hian a unaupa, Meghalaya chief minister Conrad Sangma'n Inrinni liam taa Imphal-a  National People’s Party (NPP) office thar a hawnnaah a zui a ni. Imphal-a  Bir Tikendrajit International Airport-ah an swab sample test chu Rapid Antigten Test hmanga endik niin James Sangma hi a positive a, CM Sangma erawh a negative a ni. James hi asymptomatic niin harsatna a nei lo. 

Covid-19 positive tih hriat chhuah a nih hnu hian James Sangma hi Inrinni zan khan motor-in Shillong lam a pan leh nghal. Nimin zing khan minister pilot car hi Assam-a Nagaon-ah a chesual a, car-a chuang police constable paliin hliam an tuar. 

Nagaon superintendent of police Gaurav Abhijit Dilip chuan minister pilot car hian truck ding lai a su niin a sawi a, police hliam tuarte hi Nagaon Civil Hospital-ah enkawl an nih thu a sawi. Chetsualna a thlen hnu hian Nagaon police-te chuan pilot car thlaktu tur hi ruahman sakin, nimin khan minister James Sangma pawhin Shillong a pan zui leh nghal a ni.