Arunachal Pradesh: Kra Daadi khaw miten air gun 116 tung

Arunachal Pradesh-a Kra Daadi khaw mite chuan ramsa humhalh tura intiamin air gun 116 an tung,. An silai tun hi district headquarters, Palin-a museum ah pholan a ni.

Ramsa humhalh a, sa pel lo tura intiamna hi Nyishi Elite Society (NES), Nyishi hnam pawl hmalaknain neih a ni.

Arunachal hi thing leh mau bakah ramsa mawi tak tak awmna hmun a ni a, hetih lai hian sa an pel nasat avangin sava leh ramsa pawh an rem phah nasa hle. Hei vang hian NES chuan district thuneitute nena hma lain, tualchhung mite chu ramsa humhalhna kawnga zirtirna te pein, sa pel bansan a an silaite tung turin an ngen a ni. An hma lakna hian khaw hrang hrangah nghawng pawh a nei tha hle.

Khaw chhung miten sa pelna atana an hman, an silai an tun takte dahna atana museum an siam hi NES general secretary, Heri Maring chuan a hawng. He hun hi urban minister Balo Raja leh MLA Jikke Tako bakah Deputy Commissioner Charu Nili ten an hmanpui a ni.

Chief minister Pema Khandu chuan a microblogging site X ah an hmalakna vanga a lawm zia thu a chhuah a, ramsa leh thing leh mau humhalhna kawnga entawn tlak tak an siam chu a lawm thu a sawi. "Palin-a Air Gun Museum siam chuan thuchah ropui tak, sapel aiin humhalh a ṭhat zawk zia a puang chhuak a ni" tiin hemi avanga hma la tu Nyishi Elite Society leh tualchhung mipute chunga a lawm thu CM chuan a sawilang bawk.