Social event leh political rally vangin hri kai pung chak : Tripura

Tripura sorkarin an state-a hripui leng mek dinhmun a zirchiannaah, August 5-a inkharkhipna, lockdown hlih a nih hnua social event leh political rally-te neih chhoh a nih hnuah an state-a hri kai chu nasa takin an pung tih a tarlang. 

He zirchianna hi West Tripura district thuneituten an buatsaih a ni a, an report-ah chuan August 17 aṭangin hri kai hi an pung chak hle tih an sawi.

 

West Tripura District Magistrate Sailesh Kumar Yadav chuan, "Inkharkhipna hlih a nih hnuah social function hrang hrang leh political rally-te neih a ni a, mipuite inthlahdahin sorkarin hri darh tur venna atana kaihhruaina a siamte an zawm ṭha lo a ni," a ti. Hei hi an district chhung, a bikin Agartala-a hri kai an pun chakna chhan a ni tih a sawi bawk. 

District huam chhungah bik hian hri kai, in lama inenkawl mek 2,400 awmin, an zinga 1,674 chu Agartala-a mi an ni. Heng mite hi sorkarin an ei tur a thlawnin a pe tih Yadav chuan a sawi. 

Tripura-ah hian state pumah hri kai hmuh chhuah 17,833 an awm tawh a, an zinga 10,734 chu dam leh tawhin 182 in an thihpui tawh a ni. Hri thihpui rate hi 1.02%  niin, dam tawh rate hi 60.27% a ni. Hri kai thar leh thihpui an pun belh zel avangin Tripura High Court chuan state sorkar hnenah September 18 hmaa hri leng chungchanga state chhung dinhmun leh, hri kaite enkawlna hmun chungchang report kimchang thehlut turin a hriattir. 

Hri darh zel venna kawnga sorkar hmalakna pui turin sorkar lapui chuan member pathum awmna, expert team pawh kar liam ta Ningani khan a lo tir tawh a, Tripura-ah hian ni 10 an cham ang.