Thawktu mi 25 positive vangin Itanagar-a hospital kar khat chhung khar dawn

Arunachal Pradesh khaw-pui, Itanagar-a RK Mission Hospital-a thawktu 25 te chu Covid-19 an kai tih hmuh chhuah a nih avangin vawiin aṭangin hospital hi kar khat chhung atan khar a ni. 

RKMH Secretary Swami Vishweshananda  chuan hri kai hmuh thar zingah hian doctor pathum an tel tih a sawi. Vawiin aṭangin hospital chu damdawi hmanga kah thianghlim a ni dawn tih a sawi a, thawktute ho pawh enfiahin, contact tracing pawh neih a ni dawn tih a sawi. 

Secretary chuan a duty-na aṭang hri kai, hospital-a female sanitary assistant Samli Sangdigoria chu Zirtawpni khan a thi tih a sawi a, an state-a Covid-19 vanga healthcare worker zinga nunna chan hmasa ber a ni.