Nagaland: Krismas phur takin hmang

Kristian tamna hmun Nagaland ah Nilaini khan Krismas ni hlimawm tak leh phurawm tak an hmang a, he hunah hian tawngtaihona te neiin ruai an theh bawk a ni.

Chenna in, kawtthler leh sorkar office leh sumdawnna hmun building te chu mawi taka chei ani bawk. Thawhlehni zan khan krismas urlawk hmangin zaihona hun te an nei a, mipuite pawh krismas chibai an in buk a ni.

Zanlaiah halmawi chi hrang hrang halin biakin dar te pawh an vaw ri bawk.

Nilaini khan mipuite chu biakinah inkhawmna hun neiin tawngtaihona hun an nei a, Pathian thu sawi ngaihthlakna hun an nei bawk.

Mipuite chu inngaihtawnna thinlung pu tur tein an in chah a, kumthar lo awm tur atan Isua Krista min zirtir dan anga nung turin an inhrilh bawk a ni.

Nagaland governor La Ganesan, chief minister Neiphiu Rio leh deputy chief minister leh BJP Legislature Party hruaitu Y Patton te chuan mitinte chu krismas duhsakna an hlan bawk.

Governor Ganesan chuan he hunpuiah hian inlungrualna, inhmangaihtawnna te, mi chunga that chhuah leh lawmthu inhrilh na hun atan hmang theuh turin mipui a sawm bawk a ni.