Khandu-a'n a ministry tilian

Arunachal Pradesh Chief Minister Pema Khandu chuan Nilaini khan ministry tih len belhin, thuneihna a chelh aṭanga ni 16-ah cabinet minister turin mi 10 a ruat belh.

Minister tharte lawmluhna inkhawm hi Raj Bhavan, Darbar Hall-ah buatsaih a ni a, State Governor Tatha-gata Roy chuan rinawmna thu tiam tirin cabinet minister thar te hi a lawm lut a ni. Lawmluh inkhawm hi Deputy Chief Minister Chowna Mein, State Legislative Assembly speaker Tenzing Norbu Thongdok, Lok Sabha MP Ninong Ering, chief minister hlui Nabam Tuki, MLA leh police official ten an hmanpui a ni. Minister lawmluh thar te chu Tanga Byaling, Rajesh Tacho, Nabam Rebia, Honchun Ngandam, Wangki Lowang, Kamlung Mossang, Tapang Taloh, Kumar Waii, Takam Pario leh Jomde Kena te an ni.

July 17 khan Khandu hi Aruanchal Pradesh Chief Minister pakuana ni turin lakluh a ni a, kum 37 mi lek niin India rama chief minister naupang ber a ni. Congress Chief Minister Nabam Tuki rorelna paihthlak a nih hnuah, Congress MLA hel hruaitu Khaliko Pul chu chief minister atan lakluh leh a ni. Mahse Supreme Court chuan July 13 khan thupek chhuahin, Congress sorkar din leh turin a hriattir a ni. Governor chuan Congress-in sorkarna siam turin thlawptu a ngah tawk em tih fiah turin a ti a, Congress sorkar paihthlak laia chief minister Nabam Tukki chuan Pema Khandu kianin, Khandu hi Congress MLA 45 leh Independent MLA pahnih ten thlawpin chief minister atan lakluh a ni ta a ni.

Pema Khandu hi AP chief minister hlui Dorjee Khandu fapa a ni. Chowna Mein chu Deputy chief minister niin, Speaker atan Nabam Rebia chu lakluh a lo ni tawh bawk. Arunachal Assembly-ah hian MLA 60 an awm mek a ni. Tun hnaia Cabinet meet chuan Deputy Director of School Education office din a remti a, Longding leh Capital Complex-ah din tura ruahman a ni. Hei bakah hian “Arunachal Pradesh Anatomy Bill” chu assembly session neih huna pharh turin duan a ni a, AP-ah hian Medical Colleges leh Homeopathy College din tura hma lak a ni mek bawk.