NSF ten AFSPA hlih phutin lungawilohna lantir

Naga Students’ Federation (NSF) te chuan Nilaini aṭang khan an state-a Armed Forces Special Powers Act (AFSPA) hman mek duh lohna lantirna leh Disturbed Areas Act (DAA) duh lohna lantirin Kohima-ah kawng an zawh.

NSF te hmalakna hi Naga Hoho, Naga Peoples’ Movement for Human Rights (NPMHR) leh Naga Mothers’ Association (NMA) te chuan an thlawp a ni. NSF te chuan lungawiloh lantira nawrh an huihawt mek chu Agust 11 thleng an kalpui tur thu an sawi. A thawh khatna hi Nilaini aṭang khan ṭan niin, Naga te chenna huam chhunga zirnain zawng zawngah badge dum bel vek a ni a, vawiin hian a tawp dawn a ni. NSF president Subenthung Kithan chuan, "A thawh khatna zawh hnu hian committee kan nei nghal dawn a, hmalak dan tur kan rel dawn a ni. Lungawi lohna lantirna hi Agust 11 thleng kalpui a ni ang" a ti.

Hemi chungchangah hian July 25 khan pawl hrang NSF, NPMHR, Naga Hoho leh NMA te chuan meeting an nei a, lungawilohna lantira kawng zawh ni se an ti. Angami Students’ Union (ASU) te chuan dan hre mite rawn an tum thu leh AFSPA hlih a nih theih nan hmalak an tum thu an lo sawi ve tawh bawk. NSF president chuan kum 1958 aṭanga AFSPA chu hman ṭan a nih tawh thu sawiin, boruak a ralmuan tawh vangin AFSPA chu hlih a hun tawh a ni, a ti. August 11-a kawng zawh runpui an neih leh tur thu sawiin, headquarters, units leh sub-ordinate bodies bakah tribal Hohos leh mother association te chu he kawngzawh zawm tura sawm an nih thu Kithan chuan a sawi bawk.

Naga Hoho general secretary Mutsikhoyo Yhobu chuan lungawilohna lantir avang hian hmun ṭhenkhatah National Highway-a lirthei che vel chu hun eng emaw chen a khaihlak a, hei vang hian Assam Rifles aṭanga show cause notice an dawn hial thu a sawi. Yhobu chuan, "Sorkar laipui hian eng tia rei nge Naga area-ah hian AFSPA hi hman a tum, remna zawngin vawi tam tak inbiakna neih a ni tawh a, mahse tun thlengin a hlawhtlinna a la awm lo a ni" a ti. Naga Mothers Association (NMA) advisor, Rosemary Dzuvichu chuan, "Assam Rifles te hian inquiry commission din a nih tih an theihnghil ta em ni, tun hnenah mah legal notice a pe tur a ni lo" tiin, AR te chet danah a lungawi loh thu a sawi. Naga Mothers Association (NMA) leh Pochury Mothers Association (PMA) te hian September 2015 khan July 16, 2015-a inkahna thleng avangin Supreme Court-ah an lo zualko tawh a ni.

SC chuan Gauhati High Court Kohima bench chu he thil theng chhui chiang tur hian a lo hriattir tawh a, inquiry commission din ni mah se tun thlengin report kimchang hriat a la ni lo. Pawl hrang hrangte chuan inquiry commission te hmalakna chu an duh khawp loh thu leh, hun rei tak tihkhawtlai a nih bakah tun thlenga chinfel loha ala awm chu hriatthiam har an tih thu an sawi. Dzuvichu chuan he thil hi an pawmzam mai dawn lo tih sawiin, NMA chuan Eastern Women organization leh Manipur-a mothers association te chu hmalakpui tura an sawm tur thu a sawi a ni. AFSPA hlih a nih theih nan hian Naga Peoples’ Movement for Human Rights (NPMHR) chuan ASFPA hmanna state dang Manpiur, Arunanchal Pradesh leh Jammu and Kashmir te chu thawhpuiah an sawm tur thu a sawi bawk.