Indo-Bangladesh border hung hna 2019-ah zawh hman beisei

Minister of State for Home Affairs Kiren Rijiju chuan Indo-Bangladesh border hung ṭhat hna thawh mek chu March, 2019-ah zawh hman beisei a nih thu Nilaini khan a sawi.

Kiren Rijiju chuan Rajya Sabha-ah zawhna chhangin, sorkar laipui chuan Phase-III project atan sum pe chhuakin, March, 2012 aṭang khan hna chunzawm a nih thu a sawi. Phase-I leh II chu 1986-2000 chhung khan thawh a ni a, mahse ramri hungna eng emaw zat chu ruah sur nasa, tuilian leh chhan hrang hrang vangin a him tawk lohah ngaih niin, hna hi a thara chunzawm leh a ni. Phase-I atan vaibelchhe 1,049.36 ruahman niin, Phase-II-ah vaibelchhe 4,405.00 hman ral leh a ni a, tuna Phase-III kalpui meka hnathawhna atan hian vaibelchhe 884.00 ruahman leh a nih thu Kiren Rijiju chuan a tarlang.