Assam-in vaibelchhe 11,000 a mamawh : Patowary

Assam State Transport minister Chandra Mohan Patowary chuan kumtin tuilian avanga harsatna an tawh ṭhin venna turin World Bank aṭangin state sorkar-in vaibelchhe 1,500 a puk dawn tih sawiin, hei hian an mamawh a phuhru pha dawn lo a, an harsatna sukiang tak tak tura an sum mamawh chu vaibelchhe 11,000 vel a nih thu a sawi.

Patowary hian Nilaini khan thuthar thehdarhtute kawmin, “Tuilian danna siam ngai zat thui zawng chu Km 4,474 zet a ni a, km 738 chauh tunah hian siam a la ni. Km khat zel siam nan hian sum vaibelchhe 2.5 vel zel mamawh a ni a, km 4,474-a thui tuilian danna siam tura sum ngai zat chu vaibelchhe 11,885 a ni" a ti.

Patowary chuan 11th Plan hnuaiah Assam sorkar chuan flood and erosion control scheme 100 zet kalpui turin sorkar laipuiah a thlen a, heng scheme kalpui nan hian vaibelchhe 1,139 vel mamawh a nih laiin vaibelchhe 237 an la dawng kim lo tih a sawi. 12th Plan-ah khan flood and erosion control scheme 41 duang lehin, an sum mamawh zat nia an tarlan chu vaibelchhe 1,386 a ni, mahse sorkar laipui chuan vaibelchhe 27 chiah a pe chhuak leh niin a sawi. Sorkar laipui chu an harsatna sutkian a nih theih nana hma la chak tawk lo leh ngaihthahah Patowary chuan a puh bawk.

Transport minister chuan tuilian an tawrh mek chuan thlai chinna hmun ram hectare nuai 31 a chim tawh tih sawiin, state sorkar-in thlai chinna hmun a tuilian danna hmanga a hum theih chu hectare nuai 16 chauh a ni, a ti. Patowary chuan chhiatna thleng hrang hrang chawmdawl nan hian package eng emaw zat duan a lo ni tawh ṭhin a, mahse a takah a hlawhtlinna hmuh tur a awm lo niin a sawi. Package chu politics hmanrua mai a ni, mipuite tawrhna hriatthiampui a, hma la tak taktu an awm lo niin a sawi bawk. Minister chuan tuilian dan nan hian geo-tube technology hman ni thei se a duh thu sawiin, geo-tube technology hman a nih chuan km 4,474 zeta thui siam nan chuan vaibelchhe 1,25,272 vel a ngai dawn a ni a ti a, chu chu state sorkar tan thil tih harsa tak a ni thung a ni, a ti.

Tuilian vangin

ran vulh thi an pung

Assam tuilian chuan ziaawm lam a la pan thei lo a, hriat theih chinah bawng 500 vel zet leh ranvulh dang eng emaw zat an thi tawh tih Veterinary official chuan a tarlang. Sandbar-a bawng vulh 3,000 zet te dinhmun chu a ṭha lo hle nia tarlan a ni a, an zing 150 te chu an thi tawh a ni. Majuli Sub Divisional Veterinary Officer Thaneswar Mudoi tuilian vang hian ran nana chi khat 'Lantana camara' chu a leng mek tih sawiin, fimkhur a ngaih thu a sawi. Kum 2012 khan Assam-ah hian bawng 1,73,336 vel zet a awm niin tarlan a ni. Jorhat Assistant Commissioner Meghnidhi Dahal, Project Director of Disaster Management Prankrishna Gogoi bakah ran doctor, pharmacist, nurse leh laboratory technician te chuan bawng vulhna hmun te hi tlawhin, natna laka an him theih nan hma an la mek a ni.

Assam State Disaster Manage-ment Authority (ASDMA) chuan tuilian tuartute hi an la pung zel tih sawiin, Thawhlehni thleng khan harsatna tawk mek chu mi 9,87,574 an tling tawh a tarlang. Relief camp 115-ah mi 36,442 zet an khawsa mek a ni. Tuilian hi Lakhimpur, Gola-ghat, Bongaigaon, Jorhat, Dhe-maji, Barpeta, Dhubri, Darrang, Morigaon, Nalbari, Sivasagar, Kokrajhar, Dibrugarh, Biswanath, Nagaon, South Kamrup, Kamrup (Metro), Karbi Anglong leh Chirang district te chuan an tuar nasa zual a ni.

Kaziranga National Park official chuan Nilaini thleng khan samak eng emaw zat an chanchhuak leh tih an sawi. Tuilian avanga ramsa te talbuai mek hi sapeltute chuan remchangah an lo hman avangin venhimna chu chhun zan zawma kalpui a la ni reng bawk. Tuilian vang hian samak thi 21 an awm tawh a, an la pun belh theih thu official chuan a tarlang bawk.