NHRC-in cheng nuai 5 pe turin Manipur a hriattir

Imphal West district, Chandanadi Lamkhai hmuna kum 2009, July 1-a police leh helte inkahnaa thi, Sorokhiabam Jibon chhungte hnenah zângnadawmna cheng nuai nga pe turin National Human Rights Commission (NHRC) chuan Manipur sorkar a hriattir.

NHRC chuan zângnadawmna pekna atan state sorkar chu kar riat hun a pe a, pawisa a pe ngei tih finfiahna thehlut turin a hriattir bawk.

Police leh helte inbeihnaa pawisawilo thihna thubuai ngaih­tuahin NHRC chuan police te tarlan angin inbeihna a thleng ngei a, mahse police te chuan thihna thlen khawpa tharum thawhna theihna an nei lo a, mahni invenghim tura thuneihna an neih pelin police te chu an che a ni, a ti.

Post-mortem result-a a lan danin Jibon-a taksaah hian silai kahna hnu hmun sawm a awm a, a taksa hnung lamah silai mu chhuahna sawm a awm bawk a ni. A kut leh ke-ah kutthlakna hliam a tuar bawk.

Kum 2009, July 1 khan Naran­konjin Chingjen hmuna police patrolling te chuan ṭhalai pahnih rinhlelhawm taka awm an hmu a, ding tura an tih hnuah mi pahnih chuan police te chu silaia kapletin, silai keng pakhat zawk chu a hmunah kahhlum a ni a, pakhat erawh a tlanchhe hman thung. Police te kuta thi hi Sorokhiabam Jibon a ni a, helte nena inzawmna a neih hriat a ni lo.