Indian Army-in Myanmar-ah beihpui thlak lo: ULFA (I) hotu

June 9-a Indian Army-in hmarchhak hel Myanmar-a inkulh­te lakah beihpui a thlak thu a tarlan chu Assam helpawl, United Liberation Front of Assam (Independent) hotu Paresh Baruah chuan thu dik a ni loh thu sawiin, sorkar laipuiin ṭhenawm ramte ngaihdan hriat a tumna hmanrua mai a ni, a ti a, helte leh sorkar sipaite inbeihna hmun chu India ram chhunga buaina hmunah chhunzawm zel a ni, a ti.

Baruah chuan Assam Tribune chu telephone-a biain he thu hi a sawi a, Indian Army te'n Myan­mar rama hmarchhak hel an beihna hnuhma an hmuh loh thu leh Kamatapur Liberation Organisation (KLO) helpawl hotu Jiban Singha pawh him taka a awm thu a sawi.

"Sorkar laipui chuan Myanmar rama hmarchhak hel awmte beih a tum avangin Myanmar sorkar ngaihdan hriat tumin, Indian Army te'n Myanmar ramah hmarchhak hel an bei tiin thu dik lo a thehdarh a, mahse Myanmar chuan a ram chhungah ramdang sipaite beihpui thlak a phal dawn lo tih a tichiang nghal a ni," a ti.

Sorkar laipui chuan Myanmar hmin a tumnaa a hlawhchham hnuah National Security Adviser Ajit Doval chu Myanmar-a tirh a tum a, Myanmar rama hmarchhak helte a beih theihna atan Myanmar phalna nei turin ei leh bara lama ṭan­puina pek a tiam ngei rin a ni," tiin ULFA(I) hotu chuan a sawi bawk.

"Myanmar-in a ram chhunga beihpui thlak a lo phalsak a nih chuan sorkar laipui chuan ruahman­na thar nen hmarchhak helte hi a beihlet dawn a ni, mahse tunah chuan Myanmar-ah hian kan la him a ni," tiin Baruah chuan a sawi.

India-in hmarchhak helte umchhuak tura Myanmar a lo ngen tawh chungchang sawiin Baruah chuan NSCN(K) hotu, SS Khaplang-a chu Myanmar khua leh tui a nih avangin Myanmar aṭanga umchhuah theih a nih loh thu a sawi a, Khaplang chuan Myanmar sorkar nen inkahhai thuthlung a nei mek a ni, a ti.

Sorkar laipuiin hmarchhak helte chetlak theihna ata inralring renga awm tura hmarchhak state-a security force te a hriattir chungchangah Baruah chuan inbeihna chu chhunzawm zel a nih tur thu a sawi a, mahse helte chu civil mi, pawisawilote khawih lo tura hriattir an nih thu a sawi.

Hun kaltaa ULFA (I) helte kuta pawisawilote thihna thleng ṭhin chungchangah Baruah chuan hun kal tawhah an beisei loh thil a thlen ṭhin thu a sawi a, pawisawi lo thattu, an mi leh sate chu sorkar kuta an inpek tawh thu leh sorkar pawhin a ngaihdam tawh thu a sawi.

Helte leh sorkar laka buaina chu sorkarin helte thil phut ngaih­tuahin, inbiakna mumal tak siam se la, tihreh theih a beisei thu a sawi bawk.