Manipur: PREPAK mi leh sa pahnih man

Manipur Police te chuan People's Revolutionary Party of Kangleipak(PREPAK) mi leh sa pahnih Sangaiprou Mamang Leikai, Imphal West District ah an man.

An mi mante hi Leishangthem Napoleon Meitei (35) leh Thokchom Amujao Singh (33) te anni a, dan phalloha mi chi hrang hrang hnena pawisa khawnnaah an inhnamhnawih a ni.

An kut atang hian mobile handset pathu, midang hnena phutna lehkhathawn, lirthei ke pali nei pakhat an man sak bawk.

Security ten ralthuam zawn beihpui an thlakna kalzelah ralthuam thahnem tak Churachandpur District, Muallam Khua ah December 28, 2024 khan an man bawk.

An ralthusm mante hi INSAS Excalibur Rifle leh a mu, 9mm pistol ramchhung siam pakhat leh a mu, single-barrel rifle pakhat leh a mu, INSAS ball round pathum an man.

Hei mai bakah hian Tengnoupal District Saivom khuaah December 27, 2024 khan .303 rifle pahnih leh a mu pahnih, 12 bore-single-barrel ramchhung siam pakhat, pompi silai ramchhung siam pakhat, IED pasarih, hand grenade panga, pompi mu panga, detonator 40,silaimu 60, mine detonator pathum, motorola radio set pakhat leh charger panga an man bawk a ni.