Indian Amry-in a rukin beihpui an thlak lo: Rathore
Indian Army te'n June 9-a Myanmar rama hmarchhak hel inkulhte lakah beihpui a thlak thu a tarlan chu hmarchhak hel pawl te'n thu dik lo a ni, tia an chhanlet hnuah Union Minister of State for Information and Broadcasting Rajyavardhan Rathore chuan sawifiahin, Myanmar rama Indian Army-te beihpui thlak chu a ruka kalpui a nih loh thu leh ualau taka kalpui a ni, a ti a, sipaite pawhin an ralthuam leh uniform nen helte chu an beih thu a sawi.
Indian Army Colonel hlui, Union Minister Rathore chuan he thu hi Asian News International (ANI) hmaah sawiin, Myanmar rama Indian Amry beihpui thlak chu a ruka tih a nih loh thu leh a ruka beihpui thlaknaah chuan sipaite'n uniform an hak loh thu a sawi.
Indian Amry beihpui thlakna chu Pakistan-in ngaihṭhat loh phah nan a hmang em tia ANI zawhna chu Rathore chuan chhangin, "Helte beihna chu hmundangah ni mah se hmun dangah a na tuartu an awm a, hemi chungchangah hian Pakistan pawh a rawn ṭawngchhuak a, an Prime Minister pawhin thuchhuah a siam a ni," a ti.
June 9-a Indian Army te'n Myanmar-a hmarchhak helte laka beihpui an thlaknaah hian sorkar laipui chuan Naga hel 38 chuang kahhlum an nih thu leh Indian Army zingah thi leh hliam an awm loh thu national media hrang hrangah a tarlang a, beihpui thlak chu minute 40 chhung chauh neih a nih thu a tarlang bawk.
Sorkar laipuiin hetianga thu a chhuah hi Assam helpawl, United Liberation Front of Assam (Independent) hotu Paresh Baruah chuan thu dik a ni loh thu sawiin, sorkar laipuiin ṭhenawm ramte ngaihdan hriat a tumna hmanrua mai a ni, a ti. NSCN (K) helte pawhin hemi chungchangah hian Nagaland Post-ah thuchhuah an siam tawh a, sorkar laipui thuchhuah chu thudik lo a ni tiin, a finfiahna atan Indian Army te chu NSCN (K) hel an kahhlumte thlalak tarlang turin an phut.
Myanmar pawhin hemi chungchangah hian thuchhuah siamin, Indian Army te'n a ram chhungah beihpui an thlak loh thu leh hetianga chetna chu Myanmar ram danpui palzutna a nih thu a tarlang. Hetihlai hian Myanmar sorkar chuan Nagaland hel, NSCN (K) te hi inkahhai thuthlung a neihpui mek tiin sorkar laipui thuchhuak chuan a tarlang bawk.