Meghalaya-in kalpui theih turin FSA peihfel tawh

Meghalaya Food and Civil Sup­plies department chuan National Food Security Act chu kalpui theihin a peihfel tawh a, state sorkarin fund a pe thei a nih chuan July thla aṭanga kalpui nghal a ni ang.

Food and Civil Supplies prin­cipal secretary PW Ingty chuan FSA kalpuina atan thil ṭulte an peihfel tawh thu sawiin, Community and Rural Development department-in tunhnai khan 'Socio-Economic and Caste Census' an buatsaih thu leh hemi hmanga FSA hamṭhatna dawng tur an thlanchhuah thu a sawi.

Megahalya-ah hian rural area-ah FSA beneficiary nuai 18.45 an awm a, urban area-ah nuai 3.35 an awm.

"FSA kalpui turin Food and Civil Supplies department chu a inpeih tawh a, a bak zawng chu state sorkar thu a ni tawh," tiin Ingty chuan a sawi.

FSA hnuaia hamṭhatna dawng turte chuan buhfai kg-ah cheng thumin an lei ang a, wheat (atta) chu kg-ah cheng hnihin an lei ang. Chhungkaw member pakhat zelin thla khatah buhfai kg nga ṭheuh an la thei ang.

FSA kalpuina atan state sorkar chuan a sumin bul a ṭan a ngai dawn a, mahse a senso aṭanga 75% chu state sorkarah a dil let leh thei dawn a ni.

Ingty chuan FSA hnuaia man tlawma buhfai leh chaw lam chi pekna atan hian state sorkarin thla khatah vaibelchhe 3.28 a mamawh dawn a ni, a ti.

FSA hnuaiah hian chhungkaw hotu (head of family)-ah chhungkaw nu dah a ni a, hei hi sorkar laipuiin hmeichhiate tihchak a tumna a ni.

FSA kalpui dan enpui turin state sorkar chuan State Food Com­mission a din bawk ang.