DoNER Minister-in Naga tlawmngai pawlte a kâwm

Manipur, Chandel distirct-a NSCN (K) helin June 4-a sipai convoy an lambun leh Indian Army te'n Myanmar-a inkulh, hmarchhak helte laka beihpui an thlak nia sawi chungchangah Union DoNER Minister Jitendra Singh leh Naga peace talk-a interlocutor, RN Ravi chuan tunhnai khan Nagaland tlawhin, tlawmngai pawl hrang hrangte an kâwm.

Politics kalsual avanga Nagaland leh hmarchhaka helte chetlakna chuan Naga­land mai ni lo, hmarchhak puma ei leh bar dinhmunah nghawng ṭha lo a nei dawn a ni, tiin DoNER Minister Singh chuan a sawi a, hmarchhak biala remna leh muanna tichhe thei thil chuan ei leh bar lama hmasawnna a nghawng dawn a ni, a ti.

DoNER Minister chuan sorkar laipuiin hmarchhak biala remna leh muanna awm theih nan theihtawp a chhuah mek a ni, a ti a, hemi kawnga an hmalakna chu eng thil mahin a dal lo ang, tiin a sawi.

Sorkar laipuiin inkahhai thuthlung a ziahpuite rem­na tluangtling siam pui loa a tihkhawtlai ṭhin chu NSCN (K) te'n kum 14-a upa inkahhai thuthlung an tihtawp chhan a ni em tia chanchinthar thehdarhtute zawhna chu Singh chuan a chhang lo a, NSCM (IM) nen remna zawnga inbiakna neih mek chungchangah inbiakna chu Naga mipuite huapzo thil a nih avangin pawl zawng zawng an ṭanrual a ṭul a ni, a ti.

DoNER Minister Singh chuan mipuite'n hma­sawnna kawnga sorkar laipui chunga rinna an nghah theihna nan Nagaland tlawh a ni, a ti a, Prime Mi­­nister Narendra Modi-a kaihhruai NDA sorkar chuan hmar­chhak bial chu kawng eng kimah a dah pawimawh a ni, a ti.

Interlocutor Ravi pawhin Naga peace talk neih mek chu chinfel a nih theih nan a hun takah khawtlang hruaitute leh tlawmngai pawl hrang hrangte ngaihdan lak a ni ang, a ti a, pawl hrang hrang aiawhte an tel loh chuan Naga peace talk chu chinfel theih a ni lo, a ti.

"Naga peace talk chu Naga mipuite huapzo thil a ni a, pawl pakhat chauh ni loin mi zawng zawng an tel a ṭul a ni," a ti.