NGT-in Assam leh MoEF a zilh

National Green Tribunal (NGT) chuan Kaziranga National Park (KNP) pawn lama ‘No development zone (NDZ)’ an humhalh ṭhat loh avangin Assam sorkar leh Union Ministry of Environment and Forest (MoEF) a zilh.

NGT chuan NDZ huam chhunga lung lakna hmun (quarry), leirawhchan rawh­na hmun, thingpui factory leh stone crusher dahna hmunte chu khar vek turin state sorkar a hriattir nghal.

Justice A.S. Naidu leh Dr. G.K. Pandey te awmna NGT bench chuan thuchhuah a siamah, KNP chhehvela NDZ environment humhalh kawngah NGT-in kum 1996-a hriattirna a lo tihchhuah tawh chu MoEF leh Assam sorkarin an zawm ṭha lo a ni, a ti a, KNP director hnenah environment humhalh nan cheng nuai khat ve ve thehlut turin a hriattir bawk.

Supreme Court hnuaia din, expert team te chuan kumin April khan KNP hi a hmunah tlawhin, KNP leh a chhevela ram, thing leh nungchate humhalh dan an enfiah a, state sorkar leh MoEF-in environment humhalhna atana NGT thuchhuah an palzut dante a taka hmuin, Supreme Court-ah tun hnai khan report an thehlut.