Manipur : CoTU ten kawng dan leh shutdown ti tawp

Manipur-a Committee on Tribal Unity (CoTU) te chuan National Highway NH-2 tiamchin awm loa an dan leh darkar 24 chhung Sadar Hills, Kangpokpi-a total shutdown an puan chu an ti tawp ta.

CoTU hian thuneituten 112 CRPF Battalion, Kangpokpi ami te Bungpi huamchhung, Saibol, Lhungtin sub-division a sawn an remtih tak avangin lungawi lohna an lantir hi January 5 zing dar 2 aṭang khan an ti tawp a ni.

Kuki-Zo community ten an dikna chanvo leh an ram chin venhimna khauh zawka kalpui phutin he lungawi lohna hi an lantir a, CoTU chuan an phut anga Kuki-Zo awm tamna hmuna thuneituten 112 CRPF battalion dah an remtih tak avanga an lawmthu pawh an sawi.

Hemi rual hian Central Armed Police Force (CAPF) helai hmuna la awm te chu darkar 48 chhunga an inhnuhdawh loh chuan lungawi lohna hi lantir chhunzawm zel an tum thu an sawi nghal bawk.

Kuki-Zo hmeichhia ten tunhnai khan Sadar Hills leh NH-2 chhehvelah lungawi lohna hi anlo lantir tawh a ni. Gamgiphai, Saparmeina, Keithelmanbi, Kangpokpi District Headquarters ah te leh Changoubung ah te lungawi lohna hi lantirin shutdown hian sumdawnna leh lirthei tlan te a huam a ni.