Meghalaya: Student Union ten sorkar laipui inrawlh turin phut

North Eastern Hill University Students Union (NEHUSU) leh Khasi Students Union (KSU) NEHU unit te chuan nimin Pathianni khan university inkaihhruai dana la fel tawk lo awm, member pahnih awmna committee thil hmuh chhuah chungchangah sorkar laipui chu a rang lama hmalaksak turin an ngen.

Union education minister Dharmendra Pradhan hnenah NEHUSU general secretary Toniho Kharsati chuan lehkha thawnin, November 14, 2024 khan Ministry-in a din member pahnih awmna committee in university an tlawh chungchang a tarlang a, vice-chancellor Prof. P.S. Shukla thil tih dan dik tawk lo chungchangah zirlaite hnen aṭangin finfiahna pawh an dawn thu a sawi.

Committee hi an report tihfel turin ni 15 chhung hun pek belh an nih thu November 28, 2024-a Chairman lehkhaah tarlan a ni a, mahse January 4, 2025 thleng khan report chungchangah thuthar hriat tur a la awm lo a ni.

Kharsati chuan huntiam bawhpelh a ni chuan ngaihtuahna a tih thui thu leh, Minister Pradhan chu committee te thil hmuhchhuah aṭanga hma lak sak thuai turin an phut tih a sawi a ni.

"Prof. Shukla-an university a kaihhruai danah hian thil fel hlel tam tak a awm a, NEHU hmingṭhatna leh theihna te a tihbawrhbang a ni," tiin Prof. Shukla chu a rang lama a nihna aṭanga bang turin a phut thu a tarlang.

Zirlai pawl chuan Prof. Shukla thuchhuak te zawm an tum loh thu an sawi bawk a, a lakah rinna an neih tawh loh thu an sawi. Hei mai bakah hian Prof. Shukla chu university chhunga a lut tur dan zel an tum thu pawh sawiin, a awm ve chuan university hmasawnna tura a ti chhia a ni, an ti.

Minister hnena lehkha an thawnah hian NEHU-ah mumal taka zirna kalpui a nih leh thuai theihna turin sorkar laipui inrawlh thuai turin an ngen a ni.