Arunachal Pradesh: Police ten ruihhlo leh a zuartu mi 91 man tawh

Arunachal Pradesh-a Naharlagun police te chuan ruihhlo dap beihpui an thlak, 'Operation Dawn' ah ruihhlo kg 7 an man a, heng zingah hian heroin gram 588, cannabis kg 7 bakah Lorazepam leh Morphine te an tel.

Ruihhlo dap beihpui an thlakna kalzelah hian mi 91 manin, mi 41 chu NDPS hnuaiah 2024 khan case an siamsak tawh bawk a ni.

Superintendent of Police Mihin Gambo chuan an hmalakna chuan rahṭha a chhuah chhoh zel thu a sawi a, ruihhlo leh a kaihhnawiha inhnamhnawih leh bungrua tawlhruk hmang an man hnem tawh thu a sawi. An hmalakna hian rukruk case a tih tlem bakah ruihhlo hmansualna pawh a tih tlem thu sawi bawk.

Police-te hian ruihhlo dap beihpui an thlak bakah hian school, college leh rehab center ah te ṭhalaite chu ruihhlo hmangsual lo tura zirtirna te an nei bawk. Gambo chuan ṭhalai ruihhlo vanga talbuai mekte pawhin an programme buatsaih kaltlang hian puihna te an rawn dil thute a sawi a ni.

Operation Dawn hian dan phalloh ruihhlo inhlanchhawn a tihtlem bakah ṭhalai tamtak ruihhlo bawiha tang tur a venhim thu sawiin, Gambo chuan mipuite thlawpna a pawimawh thu a sawilang bawk.

State chhunga ruihhlo hluar zualna hmunah 'Operation Dawn 2.0 chu kumin chhungin kalpui a ni dawn a, ruihhlo hmangsual an tlem zel leh, a kaihhnawiha pawikhawihna thleng ṭhin tih rem tuma an beih zel tur thu a sawi a ni.