BJP-in Naga political issue a hre chiang lo: NPCC

Nagaland Pradesh Congress Committee (NPCC) chuan central-a BJP sorkar chu Naga political issue hrechiang loah a puh.

NPCC chuan Naga political issue chu party politics aia lian zawk a ni tiin, sorkar laipuiin NSCN (K) inkahhai thuthlung a titawp chu a dem thu a tarlang bawk.

"Central-a BJP sorkar chuan NSCN (K) inkahhai thuthlung chu thil thleng thei ngaihtuah loin a titawp a, state sorkar pawh a rawn lo a ni," tiin NPCC thuchhuak chuan a tarlang.

"Congress sorkar lo tihsual tawhte sawisel chu BJP nuam tih ber a ni a, mahse tuna thilthleng chu rorellai mawhphurhna a ni. Hemi kawngah hian hmana rorel tawh sorkar emaw nakina rorel tur sorkar a puh theih loh ang," tiin a tarlang bawk.

Nagaland-a Congress MLA te'n Chief Minister TR Zeliang-a kaihhruai, Naga Peoples' Party (NPF) sorkar an zawm chungchang tarlangin NPCC chuan party MLA pariatte chu party member an nihna a hlihsak tawh thu a tarlang a, mahse Congress member telnaa inhnamhnawih duh lo nia insawi BJP chu NPF sorkarah hian a tel reng a ni, a ti.

Mipuite chuan BJP sorkar thuchhuak dik lo tak tak an thlir reng a ni, tiin NPCC chuan Congress sorkar chuan Naga political issue chinfel nan thudelhkilh a nei ngai lo a ti a, mahse BJP chu Naga political issue chungchangah nitina a thu tidanglamah a puh.

BJP sorkar chuan Naga peace talk neih chu thla 18 chhunga a chin­fel tur thu a tarlang a, tunah chuan inbiakna chu mipui huapzoa kalpui a tum thu a tlangaupui leh tawh a ni, tiin NPCC chuan BJP chu Naga mipuite bum kual tumah a puh bawk.