Assam-in Wai Wai a khap
Assam sorkar chuan state chhunga maggi noodle hralhchhuah leh lakluh a khap hnuah Wai Wai noodle a khap ve leh ta.
Food Safety and Standards Act-2006, Section 30(2)(a) tlawhchhanin, Wai Wai noodle siamchhuah, lakluh leh hralhchhuah a khap a, khapna thupek hi ni 30 chhung hman phawt a ni ang.
Sorkar thuchhuak chuan Wai Wai noodle-ah hian food safety regulation phal loh, Mono-Sodium Glutamate (hmehhan) hmuh a nih avangin khap an ni tih a tarlang.
Food Safety and Standards Authority of India (FSSAI) chuan tunhnai khan India ram pumah Nestle India kutchhuak, maggi noodle chu lead content a san avang leh, MSG hmuh tel a nih avangin lakir turin a hriattir a, hemi hnu hian Assam pawhin hralhchhuah leh lakluh a khap nghal a ni.
FSSAI thuchhuak hi Nestle India chuan Bombay High Court-ah a khing mek.
Wai Wai hi Thailand-a Thai Preserved Food Factory Co. siam a ni a, Thai company thiamna hmangin Nepal-ah Chaudhary Group te'n an siam bawk. Chaudhary Group te hian India ramah production plant pahnih siamin, an ni hian a siamchhuah leh hralhchhuah hna an thawk a ni.