Mipuite'n right to health services nei thuai dawn: Gogoi

Assam Chief Minister Tarun Gogoi chuan state sor­karin damdawi inen­kawlna chu dan hnuaia mipuite dikna chanvoa siam a tum thu sawiin, state mipuite'n 'right to health service' an neih thuai tur thu a sawi.

Khum 200 awmna, Sonapur district hospital hawnnaah Gogoi chuan Thawhṭanni khan he thu hi a sawi a, Right to health service hnuaiah miretheite chu a thlawna damdawia enkawlna pek an nih tur thu leh a tahtawla state mipui huapzo tura kalpui an tum thu a sawi.

Gogoi chuan mitinte ban phak, health service ṭha leh changtlung pek chu state sorkar thil tum a ni tih sawiin, hemi atan hian theihtawp chhuaha hma an lak thu a sawi a, right to health service hnuaiah mitinin damdawia enkawlna an dawng vek thei dawn a ni, a ti.

Chief Minister Gogoi chuan mipuite hriselna a ngaihpawimawh thu sawiin, Health and Family Welfare Department chu maternal mortality rate leh infant mortality rate tihniam tura theihtawp chhuah tura a hriattir thu leh damlo enkawlna atan damdawi ṭha hmang ṭhin tura a hriattir thu a sawi.

Assam-a medical college an neih tawh sa bakah medical college pali- Diphu, Dhubri, Nagaon leh Lakhimpur district-ah hawnbelh an tum thu a sawi bawk a, Assam-a chhungkaw tinin damdawia enkawlna ṭha an dawn vek theih thuai a beisei thu a sawi.

Sonapur district hos­pital hawnnaah hian As­sam Health and Family Welfare Minster Dr. Naz­rul Islam pawhin thu sawiin, damdawia en­kawlna ṭha leh changtlung a awm theihna atan a department-in theihtawp chhuaha a beih thu a sawi a, hemi atan hian state sorkar chuan model hospital 61 a siam tawh thu leh heng zinga hospital 42 chu mipui hman theiha peihfel a nih tawh thu a sawi.