AASU-in Siang hydel project a dodal
Sorkar laipuiin Arunachal Pradesh Siang luia power megawatt 9,600 siamchhuak thei tur, hydro-electric project kalpui a tum chu All Assam Students’ Union (AASU) chuan a dodal.
Assam zirlai pawl chuan Siang lui khuah tur chungchangah Prime Minister Narendra Modi hnenah tunhnai khan memorandum thehlutin, tuikhuah siamin lui mawng lam a nghawng dan tur te leh a chhehvel boruak a nghawng dan turah mithiamte zirchianna neihtir hmasak phawt an phut thu an tarlang.
Prime Minister Modi chuan nikum Lok Sabha inthlan neih dawna a campaign ṭumin, power project lian tham kalpui a nih dawnin mipuite ngaihdan lak hmasak a pawimawh thu a sawi tih AASU president Dipanka Nath leh general secretary Lurinjyoti Gogoi chuan an tarlang a, hei vang hian tuikhuah lian tak siam a nih dawnin, scientific study neih hmasak phawt chu a ngaihpawimawh an beisei thu an tarlang.
Arunachal leh Assam ramri chhevela Lower Subansiri power project kalpuina atana tui khuah tum chungchangah AASU chuan Gauhati University leh IIT Guwahati-a mithiamte telna, expert committee chuan a nghawng thleng thei zirchianna neih hmasak an rawt thu a tarlang a, sorkar laipui chu zirchianna hun buatsaih thuai turin a phut bawk.