Shillong-a inchhawng sang 24 kharsak

East Khasi Hills district Deputy Commissioner (DC) Sanjay Goyal leh Superintendent of Police (SP) M Kharkrang chuan inchhawng sang sak dan tura Meghalaya Urban Development Authority (MUDA) dan siamte bawhchhetu, Shillong-a inchhawng sang 24 an kharsak.

District thuneitute chuan Thawh­ṭanni khan in neitute hnenah hriattirna pein, building ṭhenkhat chu an khar nghal a, Thawhlehnia chhuahsan nghal turin an hriattir nghal bawk.

Meghalaya hi lirnghing nat­na bial, seismic zone five-a awm a nih avangin in sak dana khuahkhirhna siam tur leh insak dante enfiah turin Meghalaya High Court hnuaiah committee din a ni a, committee chuan building 24 khar tak te hi MUDA dan phal chin baka sangin sak an ni, tiin a kharsak.

Hetihlai hian building 24-a chengte chuan chenna in dang zawnna atana hun pek an nih loh avangin chenna in nei loa an awm thu sawiin, darkar 24 chhunga chenna in dang zawn hmuh a harsat thu an sawi.

Building khar zingah hian shopping mall te pawh a awm a, dawr neitute chuan harsatna hrang hrang an tawh nghal thu an sawi bawk.

Eng vanga hun pe loa khar­sak nge an nih tih chhangin DC Goyal chuan a chhan a hriat loh thu leh High Court thupek a zawm mai thu a sawi.

Shillong-ah hian inluah man a san avangin state sorkar chuan a khuahkhirhna atan leh thubuai awm theite chinfel nan 'tenancy law' siam tumin hma a la mek a ni.