Assam-ah firfiakten mi 15 kap hlum

Nimin chawhnu lam khan Assam-a Kok-rajhar khuaa Balajan Tinali market-ah firfiakten bazar hmuna civil mite pawng kahin mi 14 an kaphlum a, mi dang 15 in hliam an tuar.

Security force-te chuan firfiak zinga pakhat hi an kaphlum bawk a, midangte erawh chu an tlanchhe hman a ni. Firfiak leh security force-te hi minute 20 vel an inkap hman a, an inkahna hmun aṭang hian AK-47 pawh chhar a ni.

Firfiakte hian bazar hmuna silai an pawng kah bakah, grenade an tipuak bawk a, grenade puak hian dawr pathum a tichhia.

Assam DGP Mukesh Sahay chuan pawikhawihtute chu hriatchian la ni lo mah se, Bodo helpawl National Democratic Front of Bodoland (Songbjijut) mi te nia hriat an nih thu a sawi. Anni hian tun hnaiah National Investigation Agency (NIA) an lo vau tawh bawk. Ni li vel liamtaah khan Assam police-te chuan NDFB-S hel pali-te chu Kokrajhar-ah hian an lo man tawh a, an kut aṭang hian pistol, revolver, automatic assault rifle, grenade leh silai mu eng emaw zat an lo mansak tawh a ni.

Pawikhawihna thlen hnu hian Assam Chief Minister Sarabanand Sonowal chuan Prime Minister Narendra Modi biain, thil awmdan te a hrilh nghal a ni. CM chuan firfiakte pawikhawihna thlenga thi chhungte leh hliam tuarte chu tuarpui thu a sawi a, thi chhungte chu cheng nuai nga leh, hliam tuarte chu cheng nuai khat ṭheuh pek an nih tur thu a sawi.

Delhi-a cham mek, CM Sonowal hian thil awmdan hi Union Home Minister Rajnath Singh leh Defence Minister Manohar Parrikar pawh a hriattir nghal a, Home Minister Rajnath Singh chuan he pawikhawihna thleng hi chhuizui nghal a nih tur thu leh, thil sual titute chu zawn chhuah ngei an nih tur thu a sawi. Pawikhawihtute zawnchhuah kawngah sorkar laipui chuan state sorkar chu a thawhpui zel dawn a ni, a ti.

Defence PRO Lt Col S Newton chuan, "Pawikhawihtute hi mi pathum/pali vel niin kan hria a, an zinga pakhat chu kahhlum a ni. Midangte pawh man ngei tumin sipaite chuan beihpui an thlak nghal a ni" a ti. Pawikhawihtuten an hman nia hriat motor pawh hmuh a ni tawh bawk.