UALA-te ralthuam nen Meghalay-a sorkar kutah inpe

Hmarchhak hel pawl lian tak pakhat United A’chik Liberation Army (UALA) te chu engmah phut nei loin, an ralthuam nen Meghalaya sorkar kutah an inpe.

UALA chairman Novembirth Marak chuan, "Ngun taka kan ngaihtuah hnuah sorkar kuta inpek hi kan remti ta a ni. Sorkar aṭangin hamṭhatna kan beisei lo a, mipuite pawhin rilru dam taka min pawm ngei kan beisei a ni" a ti. Hel inpete lawmluhna inkhawm hi Tura, West Garo Hills-ah neih a ni a, Meghalaya Chief Minister Mukul Sangma, Home Minister Roshan Warjri leh sorkar mi pawimawh ṭhahnem tak an tel. UALA member sorkar kuta inpe hi mi 68 an ni a, an ralthuam LMG, AK, barrel gun, pistols, rocket launcher leh grenade te chu sorkar kutah hian an hlan nghal a ni.

Novembirth chuan hel pawl dang A’chik Revolutionary Front (ARF) te chu sorkar kuta inpe ve tur hian an sawm tih sawiin, chhan hrang hrang vangin an rual hian an rawn inpe ve thei rih lo tih a sawi. "Tun hma lam pawhin hel eng emaw zat chu sorkar kutah an lo inpe tawh a, chung zingah chuan Hynniewtrep National Liberation Council (HNLC) mi Julius Dorphang pawh telin, a ni hi tunah chuan politician a ni tawh a, UALA te sorkar kuta an inpek theih nana hma la tu ber pakhat a ni" Novembirth chuan a ti. Khua leh tui ṭha tak ni thei tura beih a tum thu a sawi bawk.

CM Sangma chuan, "UALA ten thutlukna dik siam a, sorkar an bel hi an fakawm takzet a, Meghalaya tan chauh nilo, hmarchhak tan thil chinchhiah tlak tak a ni" a ti. Sorkar chuan a theih ang angin hamṭhatna a ngaihtuah sak dawn tih sawiin, sorkar kuta inpe tawh hel eng emaw zat an awm tih sawiin, an tan hian welfare programme siam sak an ni a, chu chu an chhawr ṭangkai theih ngei pawh sorkar chuan a duh a ni, a ti bawk.

Home Minister Warjri chuan, "UALA ten tharum thawhna bansan a sorkar an bel ta hian Assam aṭanga state an nih theih nana non-violence statehood movement kalpui min hriatchhuah tir a, vawiin ni hi ni chinchhiah tlak tak a ni" a ti. Meghalaya hi kum 1972 khan Assam state aṭanga indangin, state-ah hlan kai a ni.

UALA chanchin

θ United A’chik Liberation Army (UALA) hi February 2013 khan Norrok Momin kaihhruaina hnuaiah din a ni.

θ A’chik National Volunteers Council kehchhe ta aṭanga indin an ni.

θ October 2013 khan Novembirth Marak chuan Garo National Libera­tion Army (GNLA) aṭangin a zawm a, general secretary atan ruat a ni a, chairman a ni zui bawk.

θ Kidnap, mi thah leh tharum hmanga pawikhawihna vawi eng emaw zat an thlen tir tawh.

θ Sorkar nen December 2015 khan peace agreement an ziak.

θ An hruaitu Novembirth leh Norrok te hi most-wanted rebel list-ah an tel.

θ Norrok hian East Garo Hills Dis­trict-a Williamnagar Jail hna thawk assistant Jailer Neil Warjri leh Warder Sarai Singh Thabah te chu February 2, 2013 khan a kaphlum.

θ Kum 2012 khan Meghalaya Pradesh Congress Committee (MPCC) presi­dent Deborah Marak beih thubuaiah man a ni a, a hnuah bail-a chhuah a ni.

θ UALA te hian Assam Goalpara district-a Diwali lawmnaah pawi­khawihna thlenin, mi 7 an that.