India rama police station ṭha berah Manipur-a mi thlang

Sorkar laipuiin India rama police station  ṭha a thlanchhuahah, Manipur-a Thoubal district-a Nongpok Sekmai Police Station chu a ṭha berah thlan a ni. 

Manipur police station-te  hi a zawnin ṭum thum a ṭha bera thlan an nihna a ni a, kum 2018-ah Nambol police station leh 2019-ah Imphal-a City police station chu India rama police station hnathawk ṭha berah thlan an lo ni tawh bawk. 

Nimina sorkarin all-India ran­kings a tihchhuahah, police station hnathawk ṭha zual 10 thlanchhuah zingah hmarchhak state-a mi pathum an tel. Khawtlang mipuiten inpawhna ṭha tak an neih avanga hriat lar, Manipur-a  Nongpok Sekmai Police Station  chu India rama police station ṭha berah thlan a ni a, Arunachal Pradesh-a Changlang district-a Kharsang PS chu pathumna niin, Sikkim-a East district-a Pakyong PS chu pasarihnaah thlan a ni bawk. 

Manipur chief minister N Biren Singh chuan state police department chu lawmpuina hlanin, Manipur police-te hi inpekna, thawhrimna leh khawtlang mipuite nena thawhhona ṭha an neih zia chu he award hmang hian tihlan a ni, a ti. India rama police station 16,671 zinga hnathawk ṭha thlanchhuah hi union ministry of home affairs in a buaipui a ni a, ranking siamna atan hian two-stage process hman a ni. First stage-ah chuan  PS 750 chuang nei chin state aṭangin station ṭha pathum zel thlanchhuah a ni a, a bak state dang leh Delhi aṭangin station pahnih ṭheuh leh Union Territory aṭangin station pakhat ṭheuh thlan phawt a ni. 

Heng police station thlan chhuah­te hi hmeichhiate laka pawikhawihna thubuai, SC/ST laka thubuai, ram buai chungchang, mi bo, mi bo chhar leh tu tih hriat loh ruang chhar chungchanga an hnathawh dan te, thubuai ngaihtuah fel a nih chak dan te, sorkar thupek an kalpui dan te, infrastructrure dinhmun leh mipuite feedback aṭangtein teh an ni. 

Ram pum huapa police station ṭha zual 10 thlan chhuah zingah hian hmarchhak state-a pathum bakah Tamil Nadu-a AWPS-Suramangalam PS, Chhattisgarh-a  Jhilmili (Bhaiya Thana) PS, South Goa- Sanguem PS, Andaman & Nicobar Island-a Kalighat PS, Uttar Pradesh-a Kanth PS, Dadra & Nagar Haveli-a Khanvel PS leh Telanganga-a Jammikunta Town PS-te an tel.