Assam: Lungalhthei khur tuilianin chim; mi pathum thi

Assam-a Dima Hasao district-a lungalhthei laihchhuahna khur chu tuilianin a chim a, he hmuna thawk mi pathum an thi a, chin hriat lohin mi paruk an la awm mek bawk.

Thawhlehni khan thawktu mi pathumte an thih thu hi hriatchian a ni tawh a, chin hriat loha awmte zawn hna hi thawh mek a ni. He khur awmna hmun hi Umrangso area a ni. Dima Hasao district police chief Mayank Kumar chuan, "Thawhṭanni zan khan lungalhthei khur chhung aṭang hian tui chu put in hemi tui put hian lungalhthei khur hi a chhung aṭangin a chim a ni," tiin a sawi.

Tuiin a chim lai hian khur chhungah hian thawktu pakua an awm a, heng mite chhanchhuah hna hi Indian Army leh Assam Rifles bakah national leh state disaster relief force-te an thawk a ni. Khur hi tuiin a chim avangin diver te pawh tui chhung luhna tur hmanraw ṭha tak nen an thawk chhuak bawk. Mahse tui chim chin hi a san zel avangin, a hmuh ṭhat theih loh avangin hna a thawh chak theih loh thung. Chin hriat loha awm mi parukte awmna chin hriatchhuah thuai leh, him taka lak chhuah theih chu an tum hmasak ber a nih thu official-te chuan an sawi.

Chief minister Himanta Biswa Sarma pawhin chhanchhuah hna thawh hi a lo enpui tawh a, khura la tang mekte chu him taka chhanchhuah ngei an nih a beisei thu a sawi.