Khasi-Jaintia Development Council din phutin Meghalaya CM hnenah memorandum thehlut

Assam-a Barak Valley-a  Khasi-Jaintia Development Council Demand Committee  chuan Nilaini khan Meghalaya chief minister Conrad K Sangma hmuin, Barak Valley-a Khasi-Jaintia Development Council din an phut chungchangah memorandum an thehlut. 

Barak Valley hian district pathum - Cachar, Hailakandi leh Karimjangj a huam a ni. Committee chuan kum 2011 aṭang khan he Valley-a Khasi hnam chenna bialah Valley-a Khasi-Jaintia Development Council din an lo phut tawh a ni.

Nilainia Meghalaya CM an hmuhnaah hian KJDCDC Barak Valley president Sebatine Pakyntien chu Khasi Students' Union General Secretary, Donald Thabah-a'n a ṭawiawm a ni.  Pakyntien chuan CM Sangma hnenah hian memorandum a thehluh bakah, development council din an phut chungchang chu Assam sorkar sawipui turin a ngen a ni. 

Thabah chuan Assam sorkar chuan an state chhunga minority tribe hrang hrangte chu development council pein, hemi hmang hian health, infrastructure, roads and commu­nication leh electricity lam­ah grant a pe ṭhin tih a sawi. Assam-a Khasi awmte pawh chu minority tribe zingah an tel vang hian development council hran hi an dil ve a ni, a ti. 

Chief minister Sangma pawhin Khasi-Jaintia Deve­lop­ment Council din phut chung chang hi Assam sorkar hotute sawipui a lo tiam a, Assam CM chu meeting lo neihpui a tum tur thu a lo hrilh a ni.