Meghalaya: NEHU zirlaiten campus aṭangin Registrar chhuah tir

North-Eastern Hill University (NEHU) Student Union chuan Thawhṭanni khan university registrar Colonel (Retd) Omkar Singh chu university campus chhuahsan turin an ti a, administrative block luhna pawh an kalh a ni.

Omkar Singh hian hriattirna engmah pe lawk loa campus a luh avangin NEHUSU leh Khasi Students Union (KSU) chuan chhuak tur hian an ti a ni. NEHUSU president in campus chhungah Registrar a rawn lut tih an hriat veleh, university lam an pan nghal tih sawiin, acting vice chancellor Prof N Saha a hmuh thu a sawi. Ani pawhin Singh hi a hna chhunzawm leh tur a ni tih thu a dawn bik loh thu a lo hrilh ve bawk.

Sohtun chuan Singh hi a quarter-ah va hmuin, a file leh document te a remfel lai an hmuh thu a sawi a, heng thil la tur hian midang tir mai tura an tih bakah, university chhung luh an remtih loh thu an hrilh niin a sawi. Hemi hnu hian zirlaite chuan Singh hi campus aṭang hian hruai chhuakin, administrative block luhna pawh an kalh zui ta a ni. Sohtun chuan tun ṭum a hriattir lawk loa campus-a Singh a rawn luh vawi khatna a ni lo tih a sawi.

Hetih lai hian NEHU vice chancellor Prof. Prabha Shankar Shukla hian January 12 thleng chawlh a lak belh a, zirlaite pawh hian Prof Shukla pawh hi university campus a luh an lo khapsak tawh bawk.