Manipur : Governor-in relief camp tlawh

Manipur governor Ajay Kumar Bhalla chuan Thawhlehni khan tualchhung buaina avanga Churachandpur leh Bishnupur district-a chenna in chhuahsan, relief camp-a awm mekte a tlawh.

Churachandpur-a Sadh­bhavna Mandap camp a awm mek te chuan an harsatna tawh hrang hrangte chu Governor hnenah hian an lo thlen a ni. Governor hian dawhthei taka lo ngaihthlak sakin, sorkarin ṭanpuina a pek chhunzawm zel tur thu a tiam.

Kum 2023-a Manipur-a tualchhung buaina chhuah vanga mahni in chhuahsan hi mi sang tel an awm a, buaina a la chhuah thar reng avangin mahni in lama la kir thei lo tam tak an awm. Governor Bhalla hian Churachandpur-a civil society organization te chu DC Office-ah meeting a neihpui bawk a, remna leh muanna awm theih nan pawl hruaitute chu hma la chhunzawm zel turin a chah bawk.

Governor hian Chura­chandpur College ah IT centre hawng nghalin, zirlaite nen inkawmna hun an hmang bawk a ni. Governor chuan state chhunga boruak ralmuang a awm a, zirlaite pawhin an nunphung pangngai an zawh leh theihna turin sorkar chuan theihtawp a chhuah zel tih a sawi. "Zirlaite hi kan ram enkawltu turte an la ni a, an tawrh hi kan phal lo a ni," a ti.

Bhalla hian Chingnu Thangjing Guest House relief camp, Moirang, Bishnupur District-a mi pawh a tlawh bawk a, relief camp a awm te mamawh hrang hrang semin, an dinhmunte hrechiang turin inkawmna hun a hmanpui bawk.

Kumin January 3-a Manipur governor atana lak luh a nih tukah khan Bhalla hian security official-te meeting neihpuiin, tualchhung buaina thleng mek kara an state-a dan leh thupek kenkawh a nih dante a thlirpui. Director General of Police Rajiv Singh hnenah mipuite himna chu dah pawimawh hmasa ber turin a hrilh a, Army leh paramilitary officer-te pawh dan leh thupek kenkawh kawngah state sorkar thawhpui turin a chah bawk a ni.