Special Category Status: Tripura CM Sarkar-a'n PM Modi a hmu

Hmarchhak state te special category status tihtawp a nih chungchangah Tripura Chief Minister Manik Sarkar chuan Thawhlehni khan Prime Minister Narendra Modi a hmu.

Sarkar chuan hmarchhak state chief minister-te aiawhin PM Modi hi a hmu a, hmarchhak state te chu state hnufual zawk an nih avangin a bik taka sorkar laipui duhsakna an dawn a ṭul a ni, a ti. Special status tihtawp chu state hmasawnnain a tawrh phah an hlauhthawn thu Sarkar chuan Modi a hrilh a, hmarchhak state pariata chief minister-te chuan eng political party mi leh sa pawh ni se special status chu chhunzawm an duh thu a hrilh bawk.

Assam Chief Minister Tarun Gogoi chuan tunhnai khan Modi-a kaihhruai, sorkar laipui chu hmarchhak bial ngaihthaha puhin, Tripura Chief Minister-in special category status chungchanga hmarchhak state pariat chief minister-te aiawha Prime Minister hmu tura appointment a siam pawh ni 45 hnuah pawm a la ni lo, tih a sawi hnuah Sarkar chuan Prime Minister Modi hi a hmu thei chauh a ni.

Tripura-a infrastructure hma­sawn nan Sarkar chuan Prime Minister Modi ṭanpuina a ngen bakah India leh Bangladesh-in Land Boundary Agreement an ziah chu a taka kalpui a nih dawn tak avangin Bangladesh-in Tripura ram bung ṭhenkhat a neih hlen dan tur chungchang pawh an sawidun.