PA Sangma party pawmpuina EC-in hnawl

Election Commission (EC) chuan Thawhlehni khan Lok Sabha speaker hlui, PA Sangma-a party, Na­tional People’s Party (NPP) a pawmpuina a hnawl.

PA Sangma hi nikum Lok Sabha inthlan khan Meghalaya, Tura bial aṭangin thlan tlin a ni a, a party, NPP chuan Lok Sa­bha inthlana party senso tarlanna kimchang a theh­luh loh avangin EC chuan Meghalaya state party-a a pawmpuina a hnawl a ni.

EC chuan a thuchhuak NPP-in a zawm theih loh avangin Election Symbols (Reservation and Allotment) Order 1968 tlawhchhanin a pawm­puina a hnawl tih a tarlang a, political party zawng zawng chu Lok Sabha inthlan senso tarlanna kimchang ni 90 chhunga thehlut tur leh state assembly inthlan senso chu ni 75 chhunga thehlut tura hriattirna a tihchhuah thu a tarlang bawk.

EC hriattirna tih­chhuah angin political party te chuan August 26, 2014 ral hmain Lok Sabha inthlana an senso zat tarlanna kimchang an thehlut vek tur a ni.

EC chuan NPP hi hun tiam pelh hnuah hriat­tirna vawi hnih a pe leh a, an la thehluh theih loh avangin kumin March 17 khan Election Symbols (Reservation and Allotment) Order 1968 tlawhchhana an chunga action lak a nih lohna tur chhan sawifiah tura hriattirna a pek thu a tarlang bawk.

NPP chuan April 15, 2015 thleng senso tar­­lanna thehluhna atan hun pe turin a ngen tih EC thuchhuak chuan a tarlang a, mahse an la thehluh theih loh avangin May 15, 2015 thleng hun an pekbelh hnuah an la thehluh theih loh avangin NPP pawmpuina hi hnawl a ni, a ti.