Tripura-B'desh rel kawng ngaihtuah dawn

India leh Bangladesh inkara rel tlan tur ngaih­tuah turin vawiin hian NITI (National Ins­titution for Transforming India) Aayog chuan New Delhi-ah meeting a ko.

India-Bangladesh inkara rel tlan tur hi Tri­pura khawpui Agar­tala leh Bangladesh, Akhaura inkara tlan tur a ni a, kilometre 15-a thui a ni.

Agartala-Akhaura railway project hi kum 2010, January khan India Prime Minister Manmohan Singh leh Bangladesh Prime Minister Sheikh Hasina chuan an pawmpui a, rel kawng leh station vel te siam nan cheng vaibel­chhe 575 ruahman a ni.

Kumin June 6-a Prime Minister Narendra Modi-a'n Bangladesh a tlawh ṭum khan railway project chungchang hi Bangladesh PM Hasina nen an sawidun leh a, a rang lama hmalak an rel.

Tripura lama rel kawng siamna atan state sorkar chu ram ngaihtuah tura tih a ni a, mahse state sorkar official chuan mimal ram leina atana sorkar laipuiin fund a pek loh avang leh kum 2015-16 Railway Budget-ah fund dah a nih loh thu a sawi a, hemi chungchang hi Railway Ministry-a thlen an tum thu a sawi bawk.