NIA team-in Kokrajhar pawikhawihna chhui

National Investigation Agency (NIA) team member pali te chuan Inrinni khan Assam-a inkahna leh bomb puak avanga mi 14 thihna hmun Kokrajhar an thleng a, hnuchhui hna an thawk nghal.

Zirtawpni-a Balajan Tiniali market-a helte chetnaah khan mi 14-in nunna an chan a, hliam ṭhahnem tak an awm bawk. He pawikhawihna thleng hi National Democratic Front of Bodoland (NDFB(S)) te thil tih nia hriat a ni. Assam Finance Minister Himanta Biswa Sarma chuan pawikhawihna thlenna hmun hi pan nghalin, hel an kahhlum zinga pakhat chu Manjay Islari a ni tih thu leh, NDFB(S) area commander a ni tih finfiah a nih tawh thu a sawi.

Minister chuan NIA team chuan hnu chhui hna hi an thawk mek tih sawiin, pawikhawihtute hi thihchilh bomb hmanga mi bei ṭhin an ni em tih finfiah mek a ni, a ti. Hnuchhui hna thawh a nih mek lai hian police, para-military leh army-te chuan Chirang district-ah hel dap chhuah hna an thawk ve mek bawk. Defence lam chuan hnuchhui tih chak nan ui fing leh mamawh dangte hmangin an pui tih a tarlang.

Kokrajhar deputy commis-sioner chuan hma lak dan tur relin police, army leh parami-litary forces te nen high level security meeting an neih thu sawiin, Independence Day lo thleng turah venhimna khauh zawka kalpui a ni ang, a ti. NDFB(S) bakah hel pawl dangte chetna thleng thei veng turin Assam-Bengal interstate border chu venhimna khauh zawk pek a nih tur thu a sawi bawk.

Hetih lai hian Congress party hruaitu Kokrajhar chuan Inrinni khan Balajan Tiniali market hi tlawhin, BJP sorkar chuan a ram mipuite a venghim zo lo a ni a ti a, Independence lo thleng tur chu helten remchangah hmangin pawikhawihna lian zawk an thlen mai ang tih a hlauhawm tih sawi. Assam Director-General of Police Mukesh Sahay chuan pawikhawihtute chu National Democratic Front of Bodoland (NDFB-S) te an ni tih finfiah a nih thu sawiin, inkahna hmunah AK-56 leh 47 series rifle bakah grenade man a nih thu a sawi a ni.

Assam Chief Minister Sar--bananda Sonowal chuan pawisawilo thahna thleng chu pawi a tih thu sawiin, thi chhungte leh hliamte chu a tawrhpui tak zet thu a sawi. Sonowal chuan DGP leh State Minister Himanta Biswa Sarma te chuan pawikhawihna thlenna hmun an pan nghal thu leh, helte chu na taka beih let an nih tur thu a sawi. Thi chhungte chu cheng nuai nga ṭheuh, hliam tuar na zualte chu nuai khat pek ṭheuh pek an nih dawn bakah, hliam tenaute chu cheng 20,000 ṭheuh pek an nih tur thu a sawi bawk. CM chuan hliam tuarte dahluhna Gauhati Medical College and Hospital tlawhin, state sorkar chuan an inenkawlna senso a tum sak dawn tih a sawi.

CM Sonowal chuan thil thleng chu Prime Minister Narendra Modi leh Union Home Minister Rajnath Singh te a hriattir nghal thu a sawi. Modi chuan twitter-ah Home Ministry chuan Assam sorkar a tawrhpui thu a tarlang. Modi chuan National Security Adviser Ajit Doval hnenah Assam chief minister Sonowal chu a chenna inah pan a, hmalak dan tur sawipui tura a tih a nih thu a tarlang bawk. Congress president Sonia Gandhi leh vice president Rahul Gandhi te chuan Kokrajhar thil thleng chu an dem thu leh nunna chan chhungte bakah hliam tuarte chu an tawrhpui tak zet thu an sawi ve bawk.