Manipur-ah Technical University pahnihna tur hawng

Manipur Governor V. Shanmuganathan chuan Manipur-a Technical University hmasa ber leh hmarchhaka a pahnihna, Manipur Technical University chu State Academy of Training, Takyelpat campus-ah a hawng.

Manipur Technical University hnuai-ah hian technical institution te chu inziak lut vek tura beisei an ni. MTU-ah hian B-Tech course hrang hrang- civil engineering, mechanical engineering, electronics and communication engineering leh computer science and engineering te a zirtheih dawn a ni.

Governor V Shanmuganathan chuan MTU hawn a ni thei ta chu lawmawm a tih thu sawiin, hmarchhak state zinga technical university nei thei an ni chu ropui a tih thu a sawi. Tuna Manipura hawn tak nen hian hmarchhakah Technical University pahnih a awm a, Assam-ah hawn a lo ni tawh bawk. MTU Vice-Chancellor Vanid Joshi chuan, civil engineering zir turin mi 34 an inziak lut tih sawiin, electronic engineering (27), computer science (27), electronics and communication engineering (22) leh mechanical engineering zir turin mi 18 an inziak lut tawh tih a sawi.

Chief Minister Okram Ibobi Singh pawhin state sorkar chuan education sector lamah nasa takin hma a lak thu sawiin, theihtawp a chhuah zel dawn a ni, a ti. TU din a ni thei ta chu lawmawm a tih thu Ibobi Singh chuan sawiin, Manipur mai ni lo, hmarchhak state leh ṭhen-
awm ram Myanmar leh Bangladesh pawhin ṭangkai taka an chhawr theih a beisei thu a sawi. Manipur Technical University hawnna hun hi Deputy Chief Minister Gaikhangam, Education Minister Kh Ratankumar, Social Welfare Minister Ak Mirabai Devi, PWD Minister Ksh Biren, Agriculture Minister Abdul Nasir leh Khangabok MLA O Landhoni te chuan an hmanpui a ni.