AP-ah Highway km 2000-a thui siam dawn : Defence Minister

Defence Minister Manohar Parrikar chuan, Defence Ministry-in ram venhim kawnga a hmalakna pakhat atan Arunachal Pradesh-ah Highway km 2000-a thui siam a tum thu sawiin, hei hi India leh China inrinna McMohan Line tihchakna tur a ni a, Tawang (western) leh Vijaynagar (eastern) Arunachal Pradesh te a th;un zawm dawn tih a sawi.

Arunachal sorkar chuan McMohan Line-ah buaina leh tharum thawhna bakah dan loa ralthuam leh ruihhlo tawlh ruk a hluar hle tih sawiin, hemi titawp tur hian sorkar laipui chu an lo ngen tawh a ni.

McMohan Line-ah hian ramri chin chhinchhiahna muimal tak a awm lo nia tarlan a ni a, he lai hmunah hian India leh a ṭhenawm ram China te chuan buaina an lo tawk fo tawh a ni. Hemi chungchang hi tun-hnai khan Defence Minister Manohar Parrikar chuan Rajya Sabha-ah sawi chhuakin, "Army chuan Tawang - Vijaynagar highway siam tur hian ruahmanna a siam a, hmalakna kalpui mek a ni" a ti. Highway siam tur hian ramri depa awm Tawang, East Kameng, Upper Subansiri, West Siang, Upper Siang, Dibang Valley, Desali, Chaglagam, Kibithoo, Dong, Hawai leh Vijaynagar te a paltlang dawn a ni. He project kalpui a nih theih nan hian cheng vaibelchhe 63 ruahman a ni a, a hlawhtlin theih nan AP sorkar leh Ministry of Road Transport and Highway te chuan hma an la mek a ni, a ti.