Manipur MP-in AFSPA hlip turin sorkar laipui phut

Manipur Lok Sabha MP Dr T Meinya chuan sorkar laipui chu Armed Forces (Special Powers) Act (AFSPA)1958 hlip tura a phut thu Lok Sabha-ah a sawi chhuak.

AFSPA hlih a nih theih nan hian Irom Sharmila Chanu chuan November 2000 khan chawnghei a lo kalpui
ṭan tawh tih sawiin, "Kum 16 zet chaw a nghei hnuah vawiin aṭang hian a chawnghei a titawp tawh dawn a ni," tiin Dr T Meinya chuan a sawi. Sharmila hian chaw nghei a kalpui chhung hian Jawaharlal Nehru Institute of Medical Sciences Imphal-a special ward enkawl a nih thu sawiin, state sorkar chuan amah enkawlna zawng zawng a tumsak a ni, a ti. Meinya chuan tunhnaia Supreme Court thuchhuak chuan Army leh police te chuan AFSPA dan hnuaiah mihring te lakah duh duha chet theihna an nei tawh lo nia sawiin, sorkar laipui chu AFPS hlip thuai tura a duh thu a sawi a ni. Armed Forces (Special Powers) Act (AFSPA)1958 hi hmarchhak state pariat leh Jammu & Kashmir-ah te hman a ni a, pawl hrang hrang leh politician eng emaw zatin hlih an phut thu an lo sawi fo tawh a ni.

Manipur MP chuan HRD Minister Prakash Javdekar chu All India Federation of University and College Teachers Organization (AIFUCTO) te thil phut chu tihhlawhtlin sak tura a duh thu sawi langin, hemi chungchanga an lungawi lohna lantira Jantar Mantar, New Delhi-a hun hman an tum chu a ṭha lo a tih thu a sawi bawk. AIFUCTO hian HRD minister hnenah memorandum thehluh an tum bawk a, an thil phut zingah hian 7th Pay ennawn te, UGC regulations leh New Education Policy en nawn te a tel a ni.