N'land-a security force te inralring

National Socialist Council of Nagaland- Khaplang (NSCN-K) helte'n June 4-a Manipur Chandel district-a 6th Dogra Regiment te lambunnaa sipai 18 an kahhlum hnuah hmarchhak state boruak chuan zia awm lam a la pan thei lo a, Assam Rifles intelligence chuan tun hnai khan NSCN (K) hel 20 vel chu Dimapur-a an hmuh thu leh Manipur-a sipaite lambun ang chu Nagaland-ah a thlen theih reng thu an tarlang.

Intelligence thuchhuak vangin Assam Rifles chuan a mi leh sa, Nagaland-a awmte chu inralring renga awm turin a hriattir nghal.

Assam Rifles official chuan, Dimapur leh Kohima inkalpawhna kawngpui, National Highway 29-ah sipaite chu fimkhur a pawimawh thu leh helte an chet theih reng thu an hrilh tih a sawi a, helte chuan sipaite lambun leh an tum tih a chiang a ni, a ti.

Hetihlai hian Nagaland police te chuan an thulakna aṭangin helte chetlak tum thu a dawn loh thu an tarlang a, mahse helte vanga fimkhur a ṭul thu leh inralring renga awm a pawimawh thu an tarlang.

Dimapur leh Kohima inkarah hian Assam Rifle camp ṭhahnem tak a awm avangin NSCN (K) helte hian beih tuma hma an lak ngei an rinthu Nagaland police thuchhuak a tarlang a, hei vang hian hmun danga awm, security force te pawh inralring renga awm tura hriattir an ni, a ti.