Meghalaya mite UN-ah zualko an tum

India leh Bangladesh-in ram inchuh thubuai chinfelna atana Land Boundary Agreement (LBA) an ziah chu a taka kalpui a nih tak avangin Meghalaya mite chuan Bangladesh lakah an ram bung eng maw zat an hloh dawn nia ngaiin, United Nations (UN) ah zualko an tum.

Land Boundary Agree­ment an ziah angin India leh Bangladesh chuan ram an inluahsakte an inthleng hlen dawn a ni. Ram inthleng tur zingah hian hmarchhak bial aṭangin Assam, Me­gha­laya leh Tripura ramte a tel.

Meghalaya mite chuan LBA hi India leh Bangladesh sorkar chuan an ngaihdan pawh la loin an tifel vek a ni, an ti a, sorkar laipui chu LBA ennawn tura an phut bakah a ennawn lo a nih chuan UN-a zualko an tum thu an tarlang.

Jaintia Hills district, Dawki hmuna meeting an neihah khawtlang hruaitu leh ram neitute chuan LBA chu an hriatpui loha siam a nih avangin a rang lama ennawn an phut thu an tarlang.

Grand Council of Chiefs chairman John F Kharshiing chuan, hnam hnuaihnung an nih anga UN-ah an zualko theih thu sawiin, UN hriatpuinain ramri enfiah ngen an tum thu a sawi.