Assam: Umrangso lungalhthei khura tui chim chin sang zel

Umrangso lungalhthei khura tui lut chu tui pump-na hmanga paihchhuah hna thawh mek ni mah se, tui chim chin a san tawh avangin paih phai a la harsa hle niin National Disaster Response Force (NDRF) commander inspector Roshan Kumar Singh chuan a sawi. Khur chhunga hnathawktu la tang mekte chhanchhuah hna pawh thawh chhunzawm zel a la ni.

Sonar equipment hmanga hna thawh ni mah se khurah tui hi a luan luh zel avangin an duh anga hna an thawh chak theih loh thu a sawi bawk.

Singh chuan hmuhchhuah dang an la neih loh thu a sawi a, tui hi lungalhthei khur chhung aṭanga lakchhuah ni mah se tui hi a tlem theiloa a tam telh telh zawk a ni, a ti. He hmalaknaah hian Navy, NDRF leh Indian Army te chu thawk hoin chhanchhuah hna hi sonar equipment hmanga an thawh ni thumna a nih tawh thu a sawi bawk a ni.

NDRF chuan tui pump na khawl pahnih hman a nih thu a sawi a, zankhuain an chhunzawm tur thu leh tui hi pump chhuah vek a nih hunah hnathawktu la tang mekte zawn hna an thawh theih chauh tur thu a tarlang.

Kandari chuan hnathawh ṭan anih tawh thu a sawi a, tui pump na khawl pakhat chuan tui lak chhuah hna a thawh tawh thu sawiin pakhat zawk pawh hman ṭan a nih thu a sawi bawk.

Indian Army, Assam Rifle, NDRF, SDRF leh agency dangten chhanchhuah hna hi an thawk mek zela, a chhungah hian mi pariat an la tang a, hnathawktu pakhat ruang erawh lakchhuah ani tawh thung.