Meghalaya: ICAR in Golden Jubilee lawm

Indian Council of Agricultural Research (ICAR) chuan Meghalaya ICAR Research Complex ah January 9 khan Golden Jubilee an lawm. Golden Jubilee leh Farmers Expo 2025 hi ni hnih chhung hman a a ni a, hmarchhak biala kum 50 chhunga lo neih dan inthlak danglam dante an pholang.

Union agriculture minister Shivraj Singh Chouhan chuan helai hmuna thei, thlai leh pangpar te chu India rama thar chhuahna hmun lian anih theihna kawng a awm thute a sawi. Meghalaya ah hian hmarcha chi hrang hrang, lakhuihthei, sawhthing leh nauban te chuan hmarchhak biala agriculture dinhmun a tih san thu Chouhan chuan a sawi bawk.Thlai thar chhuahte chu rei tak an dam theih nan leh, hralhna tur tih zauh a pawimawh thu sawiin, laboratory research an neihte chu a taka hmang ṭangkai turin a chah.

Meghalaya governor CH Vijayashankar chuan thlai aṭanga hlawkna awm theite tihhmasawn a pawimawh thu a sawi a, damdawi atana hman theih sawhthing leh aieng lama an hausakna te a sawi lang bawk.

Chief minister Conrad K Sangma chuan ICAR chu thlai 100 aia tam an chin chhuah avangin a fak hle a, loneitute tan hamṭhatna tam tak an siamsak thu a tarlang.

Farmers Expo ah hian helai hmuna agriculture lama ke an pen nasat dan te an pholang a, traditional farming aṭanga cutting-edge technology an hman dan te an pholang bawk. Research presentation te neih niin loneitute chuan ICAR in kar 50 chhunga hmarchhak bial lo neih lama hma an lak danah lawmthu an sawi.

Nimin khan ICAR Research Complex, Umiam ah neih chhunzawm a ni a, agricultural scientist, loneitute leh policymaker ten hma hun lo awm zel tur atana an hmachhawp te an sawi ho bawk a ni.