Tripura Assembly of Journalist-in a thusawi sut turin Chief Minister ni thum hun an pe

Tripura Assembly of Journalists chuan an state chief minister Biplab Kumar Deb chu media mite dem leh sawiselna thu a sawi chu sut turin an phut a,a thusawi sut turin CM hi ni thum hun an pe tih Pathianni khan an sawi. 

CM Deb chuan kar liam ta Zirtawpni khan Sabroom-a special economic zone (SEZ) hawnna inkhawnah thu a sawiah, an state-a Covid-19 hri leng mek chungchangah media mite chu thu dik tawk lo leh, mipuite tichiai zawnga chhuahah a puh a, heng avang hian media mite chu a ngaidam thei lo dawn tih a sawi a ni. A thusawi hnu, Pathianni khan Ambassa, Dhalai district leh Sabroom, South Tripoura district-ah  journalist pahnih chu mipuiten kut an thlak zui a ni. 

Pathianni khan Tripura Assembly of Journalist  chuan Agartala Press club-ah meeting nei nghalin, state chhung media mite kut thlak an nih an duh loh thu leh, CM-in media mite a vau chu an dem thu an sawi a, September 21 hian state pumah lungawi lohna lantirin darkar 12 chhung bandh huaihawt an tum thu an sawi. .

Thuchhuah siamin, forum chairman Subal Kumar Dey chuan, "Chief minister thusawi hi kan dem tak zet a, ni  thum chhung  ngeiin a thusawi hi a sut kan phut a ni," a ti. CM thusawi avang hian state chhung hmun hrang hrangah journalist-te vau leh kutthlak te an tawrh phah tih sawiin, 'freedom of press' beih letna a ni, a ti.

Chairman chuan an state sorkar leh rorellai BJP chuan media-te vau daih an tum fo tih sawiin, tunah CM ngei pawhin vantlang inkhawmah a vau zui leh ta a ni, a ti. Hetiang boruak hi Emergency hun lai pawha an tawn ngai loh a nih thu sawiin, CM-in media mite a vauna avang hian urgent meeting koh a ni ta hial tih a tarlang.

Arunachal Pradesh health and family welfare minister Alo Libang chuan Pathianni khan Covid-19 a kai thu a puang. 

Kum 56 mi minister hi in lamah a inkhung hrang a, tunhnaia amah nena inhnaihna neite chu inkhung hrang ve nghal tur leh, test nei turin a chah zui bawk. 

AP-a hri kai hmuh chhuah tawh hi 5,975 an tling tawh a, Pathianni khan mi 151 in hri an kai tih hmuh chhuah thar a ni. Hri kai zinga 4,253 chu enkawl dam ni tawhin, enkawlna hmun hrang hrang aṭangin chhuah tir an ni tawh. Recovery rate hi 70.34% a ni. Hri thihpui hi mi 10 an awm tawh bawk.

Meghlaya-ah Pathianni khan hri kai hmuh chhuah thar mi 109 an awm a, an zingah hian Shillon-a Raj Bhavan staff zingah 30 an tel. 

Meghalaya Governor Satya Pal Malik pawh test zingah telin, a  test result erawh a negative tih Raj Bhavan official chuan a tarlang. 

Governor hi a result negative mahse a inkhung hrang nghal a, Raj Bhavan gate-te pawh khar nghal a ni bawk. Staff dangte pawh an sample lain enfiah an ni ang. 

State pumah hri kai hmuh chhuah hi 3,724 an awm tawh a, mi 26 in an thihpui tawh a ni. 

Tripura-ah Pathianni khan Covid-19 vangin mi 12 an thih belh leh a, an state-a ni khata hripui vanga thi an tam ber ni a thleng. Covid-19 thihpui hi mi 194 an awm tawh a ni. 

Hri kai hmuh thar mi 629 an awm leh bawk a, state puma hri kai hmuh tawh hi mi 18,932 an awm tawh.  An zinga 11,132 enkawl dam ni tawhin, enkawl mek 7,584 an la awm. Nimin thleng khan sample 3,27,846 test a ni tawh bawk. 

Sikkim-ah Pathianni khan hri kai hmuh thar mi 31 awm belh lehin, an state-a hri kai hmuh tawh hi 2,088 an tling tawh. Hri kai hmuh thar zingah hian nausen, ni hnih leka upa a tel. 

Pathianni vek khan hripui vangin mi pakhat a thi leh a, Covid-19 vanga thi hi mi 16 an awm tawh a ni. 

Hri kai hmuh chhuah tawh mi 2,088 zingah 1,505 chu enkawl dam an ni tawh a, enkawl mek 567 an la awm. Nimin thleng khan state pumah sample 45,075 test a ni tawh. 

Manipur-ah hri kai hmuh chhuah thar zingah mi 117 chu hmun danga zin chhuahna nei lo, tualchhung aṭanga kai an ni tih official-te chuan an sawi. 

Heng mite hi Pathiannia hri kai hmuh thar mi 144 zinga mi an ni. Anni nen hian state puma hri kai hmuh tawh hi 7,875 an tling tawh. 

Hri kai hmuh tawh zinga 6,191 chu enklaw dam ani tawh a, recovery rate hi 78.61% a ni. Hetih lai hian Covid-19 thihpui hi mi 46 an awm tawh thung.